Ռուսական Regnum լրատվական գործակալության փոխանցմամբ՝ ԱՄՆ-ի հայկական, քրդական և հունական համայնքների ներկայացուցիչները նամակ են հղել ԱՄՆ Կոնգրեսին՝ խնդրելով հետաքննել 2011 թվականի դեկտեմբերի 28-ին թուրք-իրաքյան սահմանին գրանցված միջադեպը։
Հիշեցնենք, որ այդ ժամանակ Թուրքիայի հարավարևելյան հատվածում ընկած Շըրնաքի նահանգի Ուլուդերեի շրջանում թուրքական F-16 կործանիչների հարվածի արդյունքում զոհվել էր 35 քուրդ խաղաղ բնակիչ, որոնց զինվորականները դրել էին Քրդստանի աշխատավորական կուսակցության (PKK) զինյալների ջոկատի տեղ։ Պաշտոնական Անկարան ընդունել էր գործած սխալը՝ անզեն մարդկանց սպանությունը որակելով որպես «թյուրիմացություն»։
Կոնգրեսին ուղարկված նամակում դրա հեղինակները նշում են, որ ԱՄՆ նախագահի վարչակազմը պետք է հետաքննի և պարզի, թե արդյոք այդ հարձակման ժամանակ թուրք զինվորականները չե՞ն օգտվել ամերիկյան զինամթերքից ու սպառազինությունից, քանի որ դա հակասում է ամերիկյան զենքի վաճառքի ու գործածման մասին օրենքին։ Դրանով արգելված է ամերիկյան զենքն ուղղել խաղաղ բնակչության դեմ։
