Իսպանացի տենոր Պլասիդո Դոմինգոն արվեստ բնագավառում արժանացել է իսրայելական հեղինակավոր Վոլֆ մրցանակին: Այն Նոբելյան մրցանակից հետո համարվում է համալիր գիտական մրցանակներից երկրորդը: 2012 թ. 10 դափնեկիրների անունները հայտարարվել են հունվարի 10-ին:
Ինչպես հաղորդում է Associated Press գործակալությունը, Պլասիդո Դոմինգոն մրցանակը կիսել է Բեռլինի ֆիլհարմոնիկ նվագախմբի նվագավար Սայմոն Ռետլի հետ: Դոմինգոն դարձել է առաջին վոկալիստը, որը արժանցել է այս մրցանակին. նախկինում այն շնորհում էին միայն նվագավարներին և կոմպոզիտորներին:
Վոլֆի մրցանակը, որը շնորհվում է 1976 թվականից, մրցանակներ է հանձնում գյուղատնտեսության, քիմիայի, մաթեմատիկայի, բժշկության և ֆիզիկայի բնագավառում: The Jerusalem Post-ի փոխանցմամբ՝ մաթեմատիկայի մրցանակը ստացել են Կալիֆոռնիայի տեխնոլոգիական ինտիտուտի պրոֆեսոր Մայքլ Աշբախերին և Տեխասի նահանգի պրոֆեսոր Լուիս Սքաֆարելին:
Բժշկության բնագավառում պարգևատրել են Ռոնալդ Էվանսին Կալիֆոռնիայից, քիմիայի բնագավառում՝ Փոլ Ալիվիսատոսին Բերքլիի համալսարանից, ինչպես նաև Հարվարդի համալսարանի պրոֆեսոր Չարլզ Լեյբերին: Ֆիզիկայի բնագավառում Վոլֆի մրցանակը ստացել է Երուսաղեմում Հրեական համալսարանի պրոֆեսոր Յակով Բեկենշտեյնը:
Վոլֆի մրցանակի չափը 100 հազար դոլար է: 2011 թվականին Վոլֆի մրցանակի են արժանացել աշխարհի 23 երկրի 253 գիտնականներ և արվեստի գործիչներ: Դափնեկիրների պարգևատրման արարողությունը տեղի է ունենալու մայիսին:
