Եվրախորհուրդն ուշադրությամբ հետևում է «Ակոսի» խմբագիր Հրանտ Դինքի` 2007թ. սպանության գործի դատաքննությանը:
Ինչպես տեղեկացնում է «Ազատություն» ռադիոկայանը, այս մասին նշված է Եվրախորհրդի մարդու իրավունքների գծով հանձնակատար Թոմաս Համարբերգի` երեքշաբթի հրապարակած զեկույցում:
«Արդարադատության համակարգի գործունեությունն ու մարդու իրավունքները Թուրքիայում» վերնագրված շուրջ 40-էջանոց այս փաստաթղթում Դինքի գործով դատավարությունը հիշատակվում է մոտ 10 անգամ` հիմնականում քննադատական լույսի ներքո:
Համարբերգն իր զեկույցում ընդգծում է, որ վերջին տարիներին թուրքական արդարատության համակարգը մի շարք բարելավումներ է արձանագրել, ինչը, սակայն, Դինքի սպանության գործի քննության վրա գրեթե չի անդրադարձել:
«Եվրոպայի խորհրդի հանձնակատարը ողջունում է անպատժելիության դեմ պայքարում թուրքական կողմի արձանագրած հաջողությունները` նախևառաջ մարդու իրավունքների խախտումների մասով:
Դրա հետ մեկտեղ, մի շարք խնդիրներ մնում են չլուծված, որոնք, մասնավորաբար, ի հայտ եկան գրող եւ լրագրող Հրանտ Դինքի սպանության գործի քննության ընթացքում»,- նշում է Համարբերգն իր զեկույցում` հավելելով. «Հարկ է, սակայն, նկատել, որ վերջին շրջանի աղմկահարույց դատավարությունների, այդ թվում` Դինքի սպանության գործի դատաքննության ընթացքում արձանագրված խախտումները նպաստեցին այս թեմայի վերաբերյալ հանրային տեղեկացվածության աճին»:
Համարբերգի պնդմամբ` Դինքի գործում առկա գլխավոր թերություններից մեկը սպանության կազմակերպիչների մասով քննության անբավարար ընթացքն է:
Որպես ասվածի ապացույց` Եվրախորհրդի մարդու իրավունքների հանձնակատարը մատնանշում է Մարդու իրավունքների եվրոպական դատարանի` 2010թ. կայացված վճիռը, որում հստակորեն նշված է, որ թուրքական պետությունը թերացել է Դինքի կյանքը պաշտպանելու հարցում:
«Այս խնդրի շուրջ մի շարք վարչական հետաքննություններ են անցկացվել, որոնցում, սակայն, Դինքի ընտանիքն այդպես էլ չի ներգրավվել»,- նշված է Եվրախորհրդի զեկույցում:
«Եվրախորհրդի մարդու իրավունքների գծով հանձնակատարը լրջորեն հետևել է Դինքի գործի ընթացքին, որում Մարդու իրավունքների եվրոպական դատարանը մի շարք խախտումներ է հայտնաբերել: Թուրքական իշխանությունները պարտավորվել են վերացնել այդ բացթողումները»,- նշված է Թոմաս Համարբերգի զեկույցում:
