РИА Новости-ի փոխանցմամբ`թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն երեկ դիմում է ուղարկել խորհրդարան, որում խնդրել է իրեն զրկել պատգամավորական անձեռնմխելիությունից։ Քըլըչդարօղլուն այդ քայլին գնացել է՝ ի պատասխան Ստամբուլի դատախազության, որը նույնատիպ խնդրանքով դիմում էր ուղարկել Թուրքիայի խորհրդարան։
Քըլըչդարօղլուն հայտարարել է, որ ամենևին էլ պատգամավորական անձեռնմխելիության կարիք չի զգում և պատրաստ է այն հանձնել խորհրդարանի համապատասխան նիստից հետո։
Քըլըչդարօղլուի պատգամավորական անձեռնմխելիությունից զրկվելու դեպքում Ստամբուլի դատախազությունը պատրաստ է քրեական գործ հարուցել նրա դեմ։ Ստամբուլի դատախազությունը կարծում է, որ Քըլըչդարօղլուն հեղինակազրկում է արդարադատության մարմիններին և ճնշումներ է բանեցնում գործող իշխանություններին տապալելուն առնչվող «Էրգենեկոն»-ի գործը քննող դատարանի վրա։
Նշվում է, որ նախորդ տարվա նոյեմբերի 10-ին Քըլըչդարօղլուն այցելել է Սիլիվրիի բանտ (ուր ներկայումս հայտնվել է 2008-2010 թվականներին Թուրքիայի գլխավոր շտաբի պետ Իլքեր Բաշբուղը.- 1in.am) և հանդիպել «Էրգենեկոն»-ի գործով ձերբակալված ԺՀԿ-ական պատգամավորներ Մուսթաֆա Բալբայի և Մեհմեթ Հաբերալի հետ։
Քըլըչդարօղլուն այդ մեկուսարանն անվանել էր «Թուրքիայի ամոթ և 21-րդ դարի համակենտրոնացման ճամբար»։ Բացի այդ, նա արդարադատության մարմիններին մեղադրել էր իշխանությունների քաղաքական պատվերը կատարելու մեջ՝ ընդգծելով, որ չի կարող նրանց անվանել դատավորներ։ Արդարադատության մարմինները քաղաքական պատվեր կատարելու մեջ Քըլըչդարօղլուի կողմից մեղադրվեցին նաև օրեր առաջ, երբ կալանքի տակ վերցվեց Իլքեր Բաշբուղը։
