Կորեայի Ժողովրդադեմոկրատական Հանրապետության առաջատար թերթերը կոչ են անում Հյուսիսի և Հարավի կորեացիներին «այս տարի բացել հարենիքի ազգային միավորման ճանապարհի դռները»: Ինչպես հաղորդում է ИТАР-ТАСС գործակալությունը, պարբերականները Հյուսիսի և Հարավի միավորումն անվանում են ողջ կորեացի ժողովրդի կարևոր պարտականությունը, սակայն երկու պետությունների միավորմանը խոչընդոտում են հարավկորեացի «դավաճանների» դիրքորոշումը, գտնում են թերթերը:
Միավորման հիմք կարող են լինել 2000 թ. հունիսի 15-ի և 2007 թ. հոկտեմբերի 4-ի միջկորեական համատեղ բանաձևերը, որոնց իրագործումը թույլ է տալու «հասնել ազգային հաշտության և բարելավել Հյուսիսի և Հարավի հարաբերությունները, ինչպես նաև ազատվել արտաքին ուժերի կախվածությունից»,- նշվում է հոդվածում:
Հոդվածում «դավաճան է» անվանվում Հարավային Կորեայի նախագահ Լի Մյոն Բակը: Նյութի հեղինակների կարծիքով, Հարավային Կորեայի առաջնորդը տանում է Կորեայի Ժողովրդադեմոկրատական Հանրապետությունում գործող գաղափարախոսության և համակարգի խափանման քաղաքականություն: Բացի այդ, կորեական հանրապետության ղեկավարը հիշատակվում է որպես մեկը, ով «հանցագործություն է կատարել Կորեայի Ժողովրդադեմոկրատական Հանրապետության առաջնորդ Կիմ Չեն Իրի սգո արարողությունների ժամանակ»:
Rodong Sinmun թերթը հիշատակում է, որ սգո օրերին Հյուսիսային Կորեան պատրաստակամություն էր հայտնել ընդունել հարավկորեական պատվիրակությանը և առանձին մարդկանց, որոնք ցանկանում էին գալ և ցավակցություն հայտնել, ընդ որում՝ լիովին երաշխավորելով նրանց հարմարավետությունը և անվտանգությունը: Սակայն Հարավային Կորեան ոչ միայն արգելել էր նման այցերը, այլև փորձել էր արդարացնել իր գործողությունները:
