Eurasianet-ի փոխանցմամբ՝ Ադրբեջանի լրագրողական շրջանակների ներկայացուցիչները և քաղաքացիական հասարակության ակտիվիստները մտահոգություն են հայտնել երկրում իսլամի դերի մասին հրապարակավ քննարկման հնարավորությունների նվազման կապակցությամբ։
Այդ մտահոգությունների համար որպես խթան ծառայեց նախորդ տարվա նոյեմբերի վերջին ադրբեջանցի գրող և հրապարակախոս Ռաֆիկ Թագիի սպանությունը։ Վերջինս ակնհայտորեն քննադատում էր իսլամն ու Իրանին։ Մուհամմեդ մարգարեին քննադատող հոդված հեղինակելու համար ազատազրկում կրած 61-ամյա հրապարակախոսը Բաքվի կենտրոնում ենթարկվել էր հարձակման՝ ստանալով դանակի բազմաթիվ հարվածներ, որոնց արդյունքում էլ մահացել էր նոյեմբերի 23-ին։
Լրագրողների ազատության ու անվտանգության ինստիտուտի տնօրեն Էմին Հուսեյնովը հայտարարել է. «Թագիի մահը կարծես թե ամենաբացասական ձևով ազդեց խոսքի ու կրոնական ազատությունների վրա։ Այդ միջադեպն ավելի ուժեղացրեց տվյալ խնդրի շուրջ ինքնագրաքննությունը։ Այժմ որոշ մարդիկ իրենց անհարմար կզգան իսլամի խնդիրներն արծարծելիս»։
Իսկ ադրբեջանցի գրող Ալի Աքբարը հայտարարել է, որ այժմ իսլամի դեմ հանդես գալը դարձել է շատ ավելի վտանգավոր, քան կառավարության դեմ հանդես գալը։
