Մինչև հունվարի 8-ը «Շտապօգնություն» ծառայության ներկայությամբ գրանցվել է 9, իսկ ծառայության ժամանումից հետո` 52 մահվան դեպք: Այսօր լրագրողների հետ հանդիպմանը տեղեկացրեց «Շտապբուժօգնություն» ծառայության տնօրեն Թագուհի Ստեփանյանը`խոսելով ամանորյա օրերին գրանցված կանչերի թվի և պատճառների մասին:
Ըստ նրա` եթե ոչ տոնական օրերին ծառայությունը սպասարկում է 450-500 կանչ, ապա տոնական օրերին այդ թիվը դարձել է 750: Թ. Ստեփանյանն ասաց, որ ամենաշատ կանչեր գրանցվել է հունվարի 4-ին: Նա նաև նշեց, որ մինչև հունվարի 8-ը գրանցվել է 5708 կանչ, հոսպիտալացվել է 895 մարդ: Անդրադառնալով կանչերի պատճառներին` նա ասաց, որ ամանորյա օրերին «Շտապօգնություն» են դիմել հիմնականում սրտանոթային խնդիրներ ունեցողները, եղել է նաև 25 ալկոհոլային թունավորման դեպք:
«Մեր ծառայության համար դժվար է սպասարկել կրկնակի կանչերը, երբ մարդիկ չեն համաձայնում հոսպիտալացվել, իսկ հետո ունենալով խնդիրներ` դարձյալ կանչ են տալիս: Նաև դժվար է այդքան շատ կանչերի դեպքում բոլորին 7-12 րոպեի ընթացքում օգնություն ցուցաբերել. մենք ավելի շուտ արձագանքում ենք լուրջ դեպքերին, որոնք ճակատագրական կարող են լինել»,- նշեց Թ. Ստեփանյանը`հավելելով, որ շատ հաճախ դիմում են ատամնացավի, գլխացավի, ճնշման տատանումների և այլ թեթև խնդիրների համար`պահանջելով արձագանքել սահմանված ժամկետում:
