ԱՄՆ նախագահ Բարաք Օբամայի նախկին մամուլի քարտուղար Ռոբերտ Գիբսը հայհոյել է Միշել Օբամային այն բանից հետո, երբ մամուլում հայտնվել է վերջինս դժգոհություններն առ այն, որ Սպիտակ տանը կյանքը դժոխք է: Այս մասին ասվում է The New York Times պարբերականի լրագրող Ջոդի Կանտորի The Obamas գրքում, որը նա գրել է՝ հիմնվելով ավելի քան 33 հարցազրույցների վրա:
Ինչպես հաղորդում է Reuters գործակալությունը, գրքի հեղինակը գրում է, որ Սպիտակ տանը Օբամայի վարչակազմի աշխատակիցների հետ տեղի ունեցած խորհրդակցության ժամանակ Գիբսը նախ հայհոյել է նախագահի խորհրդական Վալերի Ջարեթին՝ իր դժգոհությունը հայտնելով, թե ինչպես կարող էին ԱՄՆ առաջին տիկնոջ այդ խոսքերը հայտնվել մամուլում: Երբ Ջարեթն իր հերթին բողոքել է, որ Միշել Օբամային դուր չեն գա իր հասցեին այդպիսի արտահայտությունները, Գիբսը սկսել է հայհոյանքներ տեղալ նաև Միշել Օբամայի հասցեին:
Գրքի այս տեղեկությունը վերջին օրերին ակտիվորեն քննարկվում է ամերիկյան մաուլում:
Բացի այդ, Կանտորը գրում է, որ Միշել Օբաման հրաժարվել է լիարժեք մասնակցություն ունենալ 2010 թ. ԱՄՆ Կոնգրեսում դեմոկրատների ընտրարշավին, ինչպես նաև Օբամայի նախագահ դառնալուց հետո առաջին ամիսների ընթացքում չի ցանկացել Չիկագոյից Վաշինգտոն տեղափոխվել:
ԱՄՆ առաջին ընտանիքը հրաժարվել է հարցազրույց տալ Կանտորին, սակայն արդեն չորեքշաբթի առավոտյան CBS հեռուստալիքի առավոտյան եթերում Միշել Օբաման հարցազրույց կտա հեռուստահաղորդավարուհի Գեյլ Քինգին:
Կանտորի գրքում տեղ է գտել նաև «Ալիսան հրաշքների աշխարհում» ֆիմից հետո Սպիտակ տանը Միշել Օբամայի կազմակերպած երեկույթը: ԱՄՆ վարչակազմի հակառակորդները նշում են, որ ԱՄՆ նախագահի նստավայրում այդպիսի երեկույթի անցկացումը ռեցեսիայի ամենաթեժ պահին առնվազն անհիմն է: Բացի այդ, նրանք մեղադրում են Օբամային, որ վերջինս փորձել է գաղտնի պահել այդ երեկույթը, քանի որ վախենում էր ընտրողների արձագանքից:
