Apple ընկերության նոր ղեկավար Թիմ Քուքը, 2011 թ. տվյալներով, դարձել է ընկերության պատմության մեջ ամենաբարձր վարձատրվող ղեկավարը: Այս մասին հաղորդում է Associated Press-ը՝ վկայակոչելով սեփական հաշվարկները: Ընդ որում, Քուքը իր նախորդից՝ Սթիվ Ջոբսից, մի փոքր ավելի է վաստակել:
2011 թ. ընթացքում Քուքն Apple-ից ստացել է 378 մլն դոլար: Այդ միջոցների զգալի մասը կազմում են մենեջերին տրված ընկերության արժեթղթերը: Դրանց կեսը Քուքի սեփականությունը կդառնա 2016 թ., իսկ մյուս մասը՝ 2021 թ.: Եվս շուրջ 2 միլիոնը կազմում է տարեկան աշխատավարձը և պարգևները:
Սթիվ Ջոբսը երկար տարիներ ընկերությունում ստանում էր խորհրդանշական 1 դոլար: Apple ընկերության հիմնադրի հիմնական եկամուտը գալիս էր նրան պատկանող բաժնետոմսերից: 2011 թ. Ջոբսին էր պատկանում ընկերության 5.5 մլն արժեթուղթ, որոնց ընդհանուր արժեքը կազմում էր 2.3 մլրդ դոլար: Թիմ Քուքի արժեթղթերի գումարը գնահատվում է 442 մլն դոլար:
Թիմ Քուքը Apple ընկերության ղեկավարի պաշտոնում Սթիվ Ջոբսին փոխարինել է 2011 թ. օգոստոսին, երբ վերջինս վատ առողջական վիճակի պատճառով հեռացավ այդ պաշտոնից:
