Հույս ունենք, որ խորհրդարանական և նախագահական ընտրությունները խթան կհանդիսանան գիտության ոլորտում բարեփոխումներ իրականացնելու համար: Այսօր «Առաջին լրատվական»-ի հետ զրույցում նման տեսակետ հայտնեց երիտասարդ ֆիզիկոս, «Պահանջում ենք գիտության ֆինանսավորում» նախաձեռնության անդամ Արթուր Մովսիսյանը`խոսելով «Պահանջում ենք գիտության ֆինանսավորում» նախաձեռնության 2012 թ. ակնկալիքների շուրջ:
Ամփոփելով նախորդ տարին` նա նշեց, որ «Պահանջում ենք գիտության ֆինանսավորման ավելացում» ֆեյսբուքյան նախաձեռնությունը ունեցավ էական հաջողություններ, սակայն հիմնական պահանջին հասնել չհաջողվեց:
«Հիմնական պահանջն է` գիտության ֆինանսավորումը հասցնել ՀՆԱ 2-3 տոկոսի»,- հաստատեց Ա. Մովսիսյանը: Խոսելով այս տարվա ակնկալիքների մասին` ասաց, որ 2012 թվականը նախընտրական տարի է և հույս կա, որ խորհրդարանական և նախագահական ընտրությունները խթան կհանդիսանան գիտության ոլորտում էական բարեփոխումներ կատարելու համար:
«Խորհրդարանական ընտրություններից ակնկալում ենք, որ կուսակցությունները կիրագործեն իրենց խոստացած օրինագծերի ընդունումը, որոնք ֆինանսական ավելացում չեն, սակայն էապես կլավացնեն գիտական միջավայրը»,- մեկնաբանեց երիտասարդ ֆիզիկոսը`հավելելով, որ պատրաստ են պատգամավորության թեկնածուներին պարտադրել խոսել գիտության խնդիրների մասին: Նրա համոզմամբ` դա երիտասարդ գիտնականների գործն է: Սակայն նաև նշեց, որ ոչ բոլորն են, որ իրավունք ունեն խոսել գիտության մասին: «Պետք է գիտության ոլորտի խնդիրները բարձրաձայնեն նրանք, ովքեր առնչություն ունեն տվյալ ոլորտի հետ»,- ամփոփեց Արթուր Մովսիսյանը`հավելելով, որ նախկինում եղել են հանդիպումներ ոլորտի պատասխանատու պատգամավորների և գերատեսչությունների հետ:
