Գիտնականներն աշխարհը կանգնեցրել են կենսաբանական աղետի վտանգի առաջ, զգուշացնում են ամերիկյան ԶԼՄ-ները: Հոլանդիայում թռչնի գրիպի հարուցիչի վրա փորձեր կատարող մասնագետները ստեղծել են վիրուս, որն ի վիճակի է սպանել տասնյակ, նույնիսկ հարյուր միլիոնավոր մարդկանց: Ինչպես հաղորդում է The New York Times պարբերականը, վտանգ կա, որ նոր հայտնագործությունը գաղտնի չի պահվի և կարող է հայտնվել ահաբեկիչների ձեռքում: Այդ պատճառով ԱՄՆ կառավարությունն արդեն կոչ է արել գիտնականներին չհրապարակել իրենց գիտական աշխատանքի մանրամասները:
Պարբերականի տվյալներով, հետազոտությունը կատարվել է Էռազմա (Ռոտերդամ) բժշկական կենտրոնում՝ ԱՄՆ Առողջապահության ազգային ինստիտուտի ֆինանսավորմամբ:
Գիտական այս բացահայտումը աննախադեպ միջոցառումների տեղիք է տվել: ԱՄՆ կառավարությանը կից անվտանգության հարցերով ազգային գիտական խորհուրդը դիմել է Science և Nature առաջատար գիտական ամսագրերին՝ խնդրելով չհրապարակել աշխատանքի մանրամասները, քանի որ այն կարող է օգտագործվել ահաբեկիչների կողմից: Խնդրանքը մեծ սկանդալի տեղիք է տվել: Սակայն վերոհիշյալ պարբերականները ըմբռնումով են մոտեցել դրան և պատրաստակամություն հայտնել կատարել կառավարության խնդրանքը:
Պարբերականներն իրենց հերթին կոչ են անում գիտնականներին վերացնել նոր վիրուսը: Ծայրահեղ դեպքում այն կարելի է պահել միայն մի քանի լաբորատորիաներում՝ չորրորդ՝ ամենաբարձր կենսաբանական անվտանգության պայմաններում:
