Ադրբեջանական APA լրատվական գործակալության փոխանցմամբ՝ Կանադայի վարչապետ Սթիվեն Հարփերը հայտարարել է, որ եթե Արևմուտքի հետ քննարկումներն արդյունք չտան, ապա Իրանը կվերածվի միջազգային խաղաղության ու անվտանգության ամենամեծ սպառնալիքի.
«Ոչ մի կասկած չկա նրանում, որ Իրանը խաթարում է միջազգային խաղաղությունը։ Իրանը ձգտում է ստեղծել միջուկային զենք։ Անկասկած է, որ երբ դա տեղի ունենա, ապա Իրանը փորձելու է օգտագործել այն։ Հորմուզի նեղուցի շուրջ այդ երկրի դիրքորոշումն ի ցույց է դնում, որ Իրանը կարող է վերածվել միջազգային խաղաղության ու անվտանգության ամենամեծ սպառնալիքի։
Իրանի նկատմամբ սահմանված պատժամիջոցները լուրջ հարված են հասցնում նրա տնտեսությանը։ Կանադան պատրաստ է իր դաշնակիցների հետ միանալ Իրանի նկատմամբ սահմանված պատժամիջոցներին։ Ռուսաստանն ու Չինաստանը նախկինում դեմ էին Իրանի հանդեպ պատժամիջոցների սահմանմանը, սակայն այն բանից հետո, ինչ նրանք հաշվի առան Իրանից բխող հնարավոր սպառնալիքը, դադարեցին առարկել պատժամիջոցների սահմանման դեմ»։
