Ճապոնիան այսօր նշում է «Չափահասության օրը»: Այս պետական տոնը նշվում է հունվարի երկրորոդ երկուշաբթին: Սակայն այս տարի 20 տարին լրացած ճապոնացիները նաև հարգում են անցյալ տարվա մարտին երկրաշարժից և ցունամիից մահացած իրենց հասակակիցների հիշատակը:
Ինչպես հաղորդում է РИА Новости-ն, անցյալ շաբաթվա ընթացքում մարդիկ ակտիվորեն նախապատրաստվում էին այս ազգային տոնին, իսկ այսօր հազարավոր երիտասարդներ ազգային հագուստներով վաղ առավոտից շարժվում են դեպի մոտակա տաճարներ: Ճապոնական օրենսդրության համաձայն՝ այդ տարիքից սկսած երիտասարդներն իրավունք ունեն մասնակցել ընտրությունների, լիակատար պատասխանատվություն են կրում օրենքի առաջ, իրավունք են ստանում բանկային և առևտրական գործարքներ կնքել և այլն:
Ավանդույթի համաձայն՝ այս օրը աղջիկները հագնում են վառ գույնի ձմեռային կիմոնո՝ երկար, մինչև գետին հասնող թևերով: Միակ տարբերությունը, որ կարող է լինել աղջիկների հագուստների միջև, կիմոնոյի գույնն է և վրայի նկարը:
Տոնի կապակցությամբ երիտասարդներին շնորհավորում են հայտնի մարդիկ՝ մարզիկներ, դերասաններ, ազդեցիկ գործարարներ:
Չափահասության օրը նշելու ավանդույթը գալիս է հին ժամանակներից: Այս տոնի մասին առաջին անգամ հիշատակվում է 714թ. պատմական ժամանակագրություններում: Այդ ժամանակ փոխում էին երիտասարդ գահաժառանգի հագուստի ձևը և սանրվածքը:
