Jam-e Jam TV հեռուստաալիքին տված հարցազրույցի ժամանակ Իրանի ԱԳՆ-ի մամլո քարտուղար Ռամին Մեհմանփարասթը հայտարարել է, որ Իրանը պատրաստ է Արևմուտքի երկրների հետ իր միջուկային ծրագրի շուրջ բանակցություններ սկսելուն։
Մեհմանփարասթը հավելել է, որ Իրանն այդ կապակցությամբ բանակցությունների պլան է ակնկալում ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնից։
Հիշեցնենք, որ օրեր առաջ Թուրքիայի արտգործնախարար Ահմեդ Դավութօղլուի հետ համատեղ մամլո ասուլիսի ժամանակ Իրանի արտգործնախարար Ալի Աքբար Սալեհին հույս էր հայտնել, որ կվերականգնվեն Իրանի և 5+1 ձևաչափով միջազգային միջնորդ խմբի (ԱՄՆ, Ռուսաստան, Ֆրանսիա, Մեծ Բրիտանիա, Չինաստան և Գերմանիա) միջև միջուկային ծրագրի շուրջ բանակցությունները։
Այդ վեցյակը 2003 թվականից սկսած՝ ԱԷՄԳ-ի հետ մեկտեղ փորձում է հասնել Իրանում ուրանի հարստացման աշխատանքների դադարեցմանը։ Իրանի և վեցյակի միջև բանակցություններն ընդհատվել են 2009 թվականին, երբ ԱԷՄԳ-ի ղեկավար խորհուրդը Իրանին դատապարտեց ուրանի հարստացման երկրորդ գործարանի կառուցման համար։
