15-ամյա ամերիկացի Ամանդա Քամինգը, որն ինքնասպան էր եղել դասընկերների սպառնալիքների և ծաղրի պատճառով, հանգիստ չի գտնում անգամ մահվանից հետո:
Ինչպես հաղորդում է Daily Mail-ը՝ նրա հիշատակին նվիրված Facebook-ի էջում որոշ մարդիկ հեգնանքով լի մեկնաբանություններ են անում, նկարներ և տեսանյութեր տեղադրում` ծաղրելով նրան ավտոբուսի տակ իրեն գցելու համար:
15-ամյա Ամանդան մահացել է ավտոբուսի հարվածից: Դրանից առաջ ծնողները հայտնաբերել էին ինքնասպանություն գործելու ցանկության մասին նրա գրած հաղորդագրությունը:
Ընտանիքի անդամների հաղորդմամբ՝ աղջկա ինքնասպանության պատճառը դասընկերների մշտական ծաղրն ու սպառնալիքներն էին: Նրա հորեղբայրը NBC-ին հայտնել է, որ աղջկան դասընկերները անընդհատ ծաղրել են, վերցրել նրա հեռախոսը, կոշիկները, բաճկոնը: