Նիգերիայում կատարված ահաբեկչությունների հետևանքով զոհվել է 20 մարդ: Ինչպես հայտնում է BBC News-ը, այս պահին ճշտվում են զոհերի տվյալները և ահաբեկչությունների թիվը:
Ականատեսների խոսքերով, 17 մարդ սպանվել է Ադամավա նահանգի հյուսիս-արևելքում գտնվող Մուբի քաղաքում: Զինյալների զոհ են դարձել իգբո ժողովրդի ներկայացուցիչները, որոնք քրիստոնեություն են դավանում: Ոստիկանությունը հայտնել է 12 զոհի մասին:
France-Presse գործակալության փոխանցմամբ, հունվարի 6-ին Ադամավա նահանգի Իոլ քաղաքում ութ մարդ սպանվել է եկեղեցու վրա կատարված հարձակման ժամանակ: Հունվարի 5-ին վեց մարդ սպանվել է Գոմբե քաղաքի եկեղեցու վրա կատարված հարձակման ժամանակ:
Մուբիում և Գոմբեում կատարված ահաբեկչությունների պատասխանատվությունն ստանձնել է իսլամիստական «Բոկո հարամ» խմբավորումը: Այս խմբավորման անդամներն էին կազմակերպել նաև 2011 թվականի դեկտեմբերի 25-ին իրագործված ահաբեկչությունը: Այդ ժամանակ երկրի տարբեր քաղաքներում պայթեցվել էին առնվազն հինգ եկեղեցի, զոհերի թիվը հասնում էր 49-ի:
2012 թվականի հունվարի 1-ին «Բոկո հարամ» խմբավորման մասնաճյուղերից մեկը քրիստոնյաներից պահանջել էր հեռանալ Նիգերիայի հյուսիսից, որտեղ մուսուլմաններն են բնակվում: