Քիչ առաջ Պետդուման դատախազության քննչական կոմիտեին իրավունք ընձեռեց քրեական գործ հարուցել Վլադիմիր Ժիրինովսկու Լիբերալ-դեմոկրատական կուսակցության անդամ, 45-ամյա պատգամավոր Աշոտ Եղիազարյանի նկատմամբ, ով մեղադրվում է խոշոր չափի խարդախության մեջ: Ինչպես տեղեկացնում է Интерфакс –ը` Պետդուման մերժեց Լիբերալ դեմոկրատական կուսակցության առաջարկը` օրակարգից հանել Ա.Եղիազարյանի նկատմամբ քրեական գործ հարուցելու վերաբերյալ համաձայնություն տալու հարցը:
ՌԴ Լիբերալ-դեմոկրատական կուսակցության լրատվական ծառայությունից քիչ առաջ «Առաջին լրատվականին» հայտնի դարձավ, որ առաջիկա րոպեներին կտարածվի Վլադիմիր Ժիրինովսկու գնահատականը Պետդումայի որոշման վերաբերյալ:
Հիշեցնենք, որ ռուսաստանցի իրավապահները պնդում են, որ Եղիազարյանին պատկանող «Դեկորում» ընկերությունը, Մոսկվայի կառավարության հետ համատեղ, 2003 թ. 200 միլիոն դոլարի վարկ էր վերցրել գերմանական Deutsche Bank-ից` ՌԴ մայրաքաղաքի խոշորագույն հյուրանոցներից մեկի` «Մոսկվա»-ի հիմնանորոգումն իրականացնելու համար: 2008-ին, երբ սկիզբ է առել համաշխարհային ֆինանսական ճգնաժամը, գերմանացի բանկիրները պահանջել են վերադարձնել գումարը, սակայն պարզվել է, որ վարկային միջոցների մեծ մասը փոշիացվել է` գերմանացիների տրամադրած 200-միլիոնանոց վարկից հյուրանոցի վերակառուցման վրա ծախսվել է ընդամենը 75 միլիոն դոլարը: Հետագայում վարկի զգալի մասը` մոտ 90 միլիոնը ձեւակերպվել է որպես Մոսկվայի իշխանությունների պարտք գերմանական բանկին: Ա.Եղիազարյանի կուսակից լիբերալ-դեմոկրատները հայտարարում են, որ նրա դեմ քրեական գործ հարուցելու մասին քննչական կոմիտեի միջնորդությունը օրինական չէ: