Մեր երկրում մաքսային խնդիրները հիմնականում 87-րդ հոդվածին են առնչվում, որ ինվոյսային գնով թույլատրվի ներմուծում դեպի Հայաստան: «Առաջին լրատվական»-ի հետ զրույցում Հայաստանի գործատուների հանրապետական միության նախագահ Գագիկ Մակարյանը նշեց, որ թվում է, թե կանոնակարգված խնդիր է, և շատ ձեռնարկություններ անցել են այդ ճանապարհով, բայց պարզվում է՝ բավականին խնդիրներ կան լուծելու:
Ըստ նրա՝ նույն օրենքի մեջ կամ ՊԵԿ նախագահի հրամանով գործող փաստաթղթերի ներկայացման մասով շատ հստակ չէ, և դա երբեմն թույլ է տալիս մերժել ու տալ ձևակերպումներ, որ վիճաբանության տեղ ունեն, և դրանց մեկնաբանություններն ու պարզաբանումները տրված չեն: Օրինակ՝ արժանահավատ հաշիվ-ապրանքագիր և այլն:
Երկրորդ խնդիրը, ըստ Գ.Մակարյանի, Առևտրի համաշխարհային կազմակերպության օրենքով, եթե կա համաձայնագիր կազմակերպության հետ, ներմուծման ժամանակ հաշիվ-ապրանքագիրը պարտադիր չի, որ ապրանքի հետ գա: Եթե այն ուղարկում են էլեկտրոնային նամակով ՊԵԿ-ի էլ.հասցեին, դա կարգոյում առաջացնում է քաշքշուկ, որ պետք է դրա վրա կնիք դրվի, որ համարվի փաստաթուղթ և միայն դրանից հետո ձևակերպում արվի: Կամ օրինակ գրում են՝ «հետագա ընթացք ապահովելու համար», բայց, միության նախագահի խոսքով, թե ի՞նչ է նշանակում «հետագա ընթացք ապահովել»՝ անհասկանալի տերմինալոգիա է: Դա նշանակում է 87 հոդվածով շարունակե՞լ, թե՞ նշանակում է մերժել:
«Շատ-շատ նման խնդիրներ կան, որ կանոնակարգման կարիք ունեն: Եվ ես զարմացած եմ, որ այսքան ձեռնարկություններ այսքան տարիներ աշխատում են, թվում է՝ պետք է կանոնակարգված լինի, բայց իրականում չի»,- ասաց Գ.Մակարյանը:
Գ. Մակարյանը նաև փաստեց, որ մաքսային ծառայությունում այսօր մաքսային ձևակերպումների արագությունները, եթե անգամ ամեն ինչ օպտիմալ է արվում, այնքան էլ չեն համապատասխանում մեր արտահանման-ներմուծման համար անհրաժեշտ պայմաններին: Օրինակ՝ Վրաստանում մաքսային ձևակերպումները 15 րոպե են տևում, ՀՀ-ում դա օրերի ու շաբաթների հարց է, իսկ չձևակերպված բեռի վրա, որը չմաքսազերծված մնում է պահեստում, բավականին գումար է գալիս, ինչը խիստ խփում է գործատուների գրպանին:
«Կան ներքին չկանոնակարգված հրահանգներ, ներքին ստորաբաժանումները միշտ չէ, որ պատրաստ են իրենց լիազորությունները կատարել ու միշտ սպասում են, որ ՊԵԿ ղեկավարությունը վերևից կասի՝ այո կամ ոչ: Օրենք կարծես թե կա, բայց այն դրված է մի կողմ և դրանով պահանջների կատարումը դառնում է ներքին բանավոր հրահանգների պատճառ»,- ասաց Գ.Մակարյանը:
