Չինաստանի Ցյույցզին քաղաքի մոտ գտնվող ածխային հանքահորում տեղի է ունեցել փլուզում, որի հետևանքով մահացել է ինը մարդ, տուժել է երկուսը: Այս մասին հայտնում է Xinhua գործակալությունը` վկայակոչելով տեղական իշխանություններին:
Ածխի կույտը փլուզվել է հանքափորների վրա, որոնք իրականացնում էին հանքահորի մաքրման աշխատանքներ: Միջադեպի արդյունքում 11 մարդ վնասվածքներ է ստացել, որից ինը մահացել է հիվանդանոցի ճանապարհին: Երկու հանքափորների վիճակը գնահատվում է կայուն: Միջադեպի պատճառները ճշտվում են:
Հիշեցնենք, որ երկու ամիս առաջ փլուզում էր տեղի ունեցել Ցյույցզին շրջանում, որի հետևանքով մահացել էր 35 հանքափոր:
Ածխահանույթի արդյունաբերությունը Չինաստանում առանձնանում է վթարային բարձր մակարդակով: 2010 թվականին հանքահորերի վթարների զոհ է դարձել 2433 մարդ, իսկ 2011 թվականի առաջին ինը ամիսներին՝ 1419 մարդ:
