Ղարաբաղյան հակամարտության կարգավորման տեսանկյունից 2012-ը Հայաստանի համար հաղթանակներն ամրագրելու, իսկ Ադրբեջանի համար՝ առավել դժվար ու դաժան տարի է լինելու: «Առաջին լրատվական»-ի հետ զրույցում նման տեսակետ հայտնեց ՀՀԿ-ական պատգամավոր Հովհաննես Սահակյանը:
«ԼՂ խնդիրը շարունակվում է չլուծված մնալ: Հակամարտությունը սառեցված չէ, և դրա վկայությունն այն է, որ խաղաղ պայմաններում դեռևս հայ զինվորներ են սպանվում: Բայց ես վստահ եմ, որ մեր պայքարն արդար է, և հարցն ի վերջո լուծվելու է հօգուտ Լեռնային Ղարաբաղի ժողովրդի: Արդարության ջատագով ժամանակակից աշխարհը պետք է աչքերը լավ բացի և տեսնի, որ իր հայրենիքի համար պայքարած ժողովուրդն արժանի է հաղթանակի: Վստահ եմ, որ արդարությունը հաղթելու է, իսկ Ադրբեջանը, չնայած ռազմական բյուջեի ավելացմանը, իր ներքին համոզմունքով ու զինվորի «դուխով» հեռու է հաղթանակից: Այդ երկրի նախագահ Իլհամ Ալիևի նյարդերն աստիճանաբար տեղի են տալիս»,- նկատեց Հովհաննես Սահակյանը:
