Ֆրանսիայի դատարանը պարտավորեցրել է արագ սննդի McDonald’s ռեստորանային ցանցին իր նախկին աշխատակցին վճարել 250 հազար եվրո` նախկինում չվճարված արտաժամյա աշխատանքի համար: Այս մասին հայտնում է Monde թերթը:
Հաղորդվում է, որ կինը, որի անունը չի նշվում, McDonald’s-ի ռեստորաններից մեկում աշխատանքի է ընդունվել 1999 թվականին և կարճ ժամանակահատվածում ունեցել է մեծ հաջողություններ` հասնելով մինչև հայտնի հաստատության ստորաբաժանումներից մեկի տնօրենի պաշտոնին: Այնուհետև նա ղեկավարել է Գենգան քաղաքում գտնվող MacDonald’s-ի չորս ստորաբաժանումները:
«Նոր պարտականությունների հետևանքով աշխատակցուհու աշխատանքային օրվա տևողությունը երկու անգամ մեծացել է. 2006-2009 թվականներին նա աշխատանքի է գնացել առավոտյան ժամը հինգին և վերադարձել կեսգիշերն անց, և դրա համար նրան ոչ մի փոխհատուցում չի վճարվել»,- ԶԼՄ-ներին հայտնել է կնոջ շահերի պաշտպանը:
Փաստաբանի խոսքերով` կինը շաբաթվա յոթ օրն աշխատել է առանց հանգստի և McDonald’s-ից հեռացել է առաջացած ընկճախտի պատճառով:
Աշխատանքի հարցերով դատարանը վճռել է, որ McDonald’s-ի պարտավոր է նախկին աշխատակցին վճարել 120 հազար եվրո գերաշխատանքի համար և ևս 130 հազար եվրո` որպես փոխհատուցում հանգստյան օրերի համար:
