«Ազատություն» ռադիոկայանի ռուսական ծառայության փոխանցմամբ՝ Ֆրանսիայի կառավարությունը պլանավորել է արագացնել Հայոց ցեղասպանության հերքումը քրեականացնող օրինագծի ընդունումը։
Այս մասին այսօր գրում է ֆրանսիական մամուլը, որի տեղեկություններով՝ ֆրանսիացի նախարարները մտադիր են արդեն հունվարի վերջին այդ հարցը բերել Սենատի նիստերից մեկի օրակարգ։
Ավելի վաղ՝ նախորդ տարվա դեկտեմբերի 22-ին, Ֆրանսիայի խորհրդարանի ստորին պալատը՝ Ազգային ժողովը, հավանության էր արժանացրել այդ օրինագիծը։
Հիշեցնենք, որ երեկ թուրքական մամուլը գրեց, թե ներկայումս Թուրքիայում քննարկվում է Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունման կանխման վերաբերյալ քայլերը, ինչի համար օրակարգում է հայտնվել դեկտեմբերի 23-ի առավոտյան Փարիզից հետ կանչված դեսպան Թահսին Բուրջուօղլուի վերադարձը։
Նշվում էր, որ Բուրջուօղլուն կարող է Փարիզ վերադառնալ մինչև հունվարի 10-ը, քանի որ հունվարի 10-ից փետրվարի 22-ն ընկած ժամանակահատվածում Ֆրանսիայի Սենատը նստաշրջան է ունենալու, ուր և քննարկվելու է Հայոց ցեղասպանության հերքումը քրեականացնող օրինագիծը։