Թեպետ Հայաստանը շահագրգռված է մասնակցել ինտեգրացիոն ցանկացած նախագծի, միաժամանակ ակնհայտ է, որ Միացյալ տնտեսական տարածության մասին համաձայնագրին անդամակցելու շուրջ մինչ այս պահը խորհրդավոր լռություն է պահպանում: «Առաջին լրատվական»-ի հետ զրույցում այս մասին ասաց քաղաքագետ Հմայակ Հովհաննիսյանը:
Նրա խոսքով՝ Բելառուսի, Ղազախստանի և Ռուսաստանի միջև օրերս պաշտոնապես գործել սկսած Միացյալ տնտեսական տարածության մասին համաձայնագրին մասնակցությունը Հայաստանի համար երկնային մանանա կլինի: «ՀԱՊԿ անդամ մյուս երկրները կարծես թե վերջնականապես կողմնորոշվել են այս հարցում: Իսկ ահա Հայաստանը երկիմաստ վիճակում է. նախ այն պատճառով, որ կառույցի անդամ հանդիսացող երկրների հետ ընդհանուր սահմաններ չունի: Այլ հարց է, եթե ինտեգրացիոն առավել գայթակղիչ ծրագրերի առաջարկ անի Եվրոպան, որը, սակայն, չի շտապում նման նախաձեռնությամբ հանդես գալ: Հայաստանի երկու հարևաններին՝ Թուրքիային և Ադրբեջանին, առայժմ հաջողվում է մեկուսացած պահել մեզ»,- նկատեց քաղաքագետը:
Հմայակ Հովհանիսյանի կարծիքով՝ Միացյալ տնտեսական տարածության մասին համաձայնագրի անդամ երեք երկրների՝ Բելառուսի, Ղազախստանի և Ռուսաստանի համար առաջնային խնդիրն այս պահին Ուկրաինայի մասնակցությունն է այդ նախագծին: «Թեպետ Ուկրաինան այս ուղղությամբ հստակ քայլեր չի անում, սակայն կան բոլոր նախադրյալները՝ ենթադրելու, որ այդ երկիրը կանդամակցի Միացյալ տնտեսական տարածության մասին համաձայնագրին: Առհասարակ, այս նախագիծը բխում է 90-ականների ռուսաստանյան տրամաբանությունից՝ թեթևացնել Մոսկվայի հոգսերը։ Այս նախագծի մասին այն տարիներին խոսում էր դեռ ՌԴ նախագահ Բորիս Ելցինը»,- հիշեցրեց քաղաքագետը:
Նշենք, որ 2012 թվականի հունվարի 1-ից Բելառուսի, Ղազախստանի և Ռուսաստանի միջև սկսել է պաշտոնապես գործել Միացյալ տնտեսական տարածության մասին համաձայնագիրը։
Դեկտեմբերին մեկնաբանելով այս նախաձեռնությունը՝ Ռուսաստանի նախագահ Դմիտրի Մեդվեդևը ասել էր, որ այսպիսով ճանապարհ կհարթվի 3 պետությունների միջև ապրանքների, ծառայությունների, կապիտալի և աշխատուժի ազատ տեղաշարժի համար։ Մեդվեդևը պարզաբանել էր, որ նախաձեռնության նպատակն է մինչև 2015 թվականը Եվրոպական Միության օրինակով ստեղծել Եվրասիական տնտեսական միություն։
Բելառուսը, Ղազախստանը և Ռուսաստանը արդեն իսկ ստեղծել են Եվրասիական տնտեսական հանձնաժողով, որը դառնալու է ստեղծվելիք միության ղեկավար մարմինը։
2011 թվականի հուլիսից Բելառուսի, Ղազախստանի և Ռուսաստանի միջև տեղակայված մաքսակետերը վերացվեցին, և երեք երկրների միջև սկսեց գործել ընդհանուր Մաքսային միությունը։
