Իրանագետ Գոհար Իսկանդարյանը չի բացառում, որ խիստ լարված իրավիճակի ֆոնին ԱՄՆ 2012 թվականին կարող է հարձակում գործել Իրանի վրա: Նման տեսակետ նա հայտնեց «Առաջին լրատվական»-ի հետ զրույցում:
«Սակայն դա կլինի ԱՄՆ-ի ամենավերջին քայլը, այդ երկիրը գիտակցում է, որ մինչև Իրանին ռմբակոծելն ուրիշ քայլեր էլ կան: Ամեն դեպքում, եթե անգամ ռմբակոծություններ լինեն, ապա համոզված եմ՝ միայն տեղային և ոչ մի դեպքում՝ մասսայական բնույթի, այլապես տարածաշրջանում քաոսային իրավիճակ կստեղծվի»,- նկատեց իրանագետը:
Հիշեցնենք, որ նախորդ տարվա դեկտեմբերի 29-ին ամերիկյան «Ջոն Սթեննիս» ավիակիրն իր ուղեկցող ռազմանավերի հետ հայտնվել էր Հորմուզի նեղուցում, ուր Իրանը դեկտեմբերի 24-ից անցկացնում էր իր տասնօրյա «Վելայաթ 90» ռազմածովային զորավարժությունները։ Ավելի վաղ Իրանը սպառնացել էր փակել Հորմուզի նեղուցը, սակայն ներկայումս հայտարարում է, որ չի պատրաստվում նման կերպ վարվել։