«Սարդարապատ» շարժման նախաձեռնող խմբի անդամ Ժիրայր Սեֆիլյանն ակնկալում է, որ գալիք` 2012 թվականին, երիտասարդ քաղաքական մտքում տեղի ունեցող խմորումները կբերեն քաղաքական նորամուծությունների: Նման տեսակետ նա հայտնեց «Առաջին լրատվական»-ի հետ զրույցում:
«Այդ նորամուծությունների շնորհիվ մեզ կհաջողվի ոչ միայն ձերբազատվել գործող ռեժիմից, այլև հիմնավոր կերպով արժեքային ճիշտ համակարգի վրա նորի հիմքեր ստեղծել: Կարծում եմ, որ 2012-ին այս ամբողջի հիմքերը դրվելու են»,- նշեց նա:
Սեֆիլյանի խոսքով, գործող վարչակազմի գործունեությունն ամբողջությամբ կարելի է դիտարկել կորուստների և ձախողումների տիրույթում: «Այս ճահճում, որը ղեկավարում են ներկայիս իշխանությունները, որևէ ձեռքբերում հնարավոր չէ ունենալ:
Ինչ վերաբերում է 2012-ի գարնանը կայանալիք խորհրդարանական ընտրություններին, ապա դրանք միտված են բացառապես գործող վարչակազմի վերարտադրվելուն: Նրանք, ովքեր մասնակցում են այդ գործընթացին, մեղսակից են մեր ժողովրդի առաջ: Ինչ էլ լինի, այս վարչակազմը գնալով ավելի ու ավելի խոցելի է դառնալու»,- ամփոփեց Ժիրայր Սեֆիլյանը` հավելելով, որ 2012-ին իշխանությունների «ինքնափլուզման շոշափելի փաստերը շատ ավելի ակնհայտ են դառնալու, քան այս տարի էր»:
