Թուրքական Anadolu գործակալության փոխանցմամբ՝ Թուրքիայի արտգործնախարար Ահմեդ Դավութօղլուն երեկ Էդիռնեում մասնակցել է «Բալկանյան պատերազմներից մինչև Բալկանյան խաղաղություն» խորագրով կոնֆերանսում, որում անդրադարձել է կատարել Հայոց ցեղասպանության հիմնախնդրին.
«1915 թվականին թուրքերը պատերազմում էին միանգամից մի քանի ռազմաճակատներով՝ ընդդեմ մեծաքանակ արևմտյան հակառակորդների։ Միայն Հալիպոլիում (Դարդանելյան օպերացիա, որն ավարտվեց թուրքական կողմի հաղթանակով.- 1in.am) մենք կորցրինք 250,000 մարդ։ Հայերը թուրքերի հարևաններն են և կիսել են նույն հողը։
Մենք կկիսենք հայերի ցավը, եթե նրանք էլ սկսեն հարգել մեր ցավը։ Միայն «արդար հիշողությունը» կարող է լուծել 1915 թվականի իրադարձությունների շուրջ առաջացած վեճը։ Յուրաքանչյուր ժողովուրդ յուրահատուկ է համարում իր կրած ցավը։ Մենք ի վիճակի ենք հասկանալու նրանց բոլորի ցավը, քանի որ «ամենաշատը» տուժել ենք հենց մենք։
Մենք «հարգում» ենք մեր հարևաններին, որոնց հետ համատեղ ապրում ենք արդեն 10 դար։ Մենք նրանց հրավիրում ենք կիսել մեր ընդհանուր ցավը։ Ընդհանուր պատմությունը միակողմանի տանջանքների պատմություն չէ, որը մոռացության է մատնում մյուս ժողովրդի զրկանքները»։
Դավութօղլուն հավելել է, որ 2009 թվականի հոկտեմբերին ցյուրիխյան արձանագրությունների ստորագրման ժամանակ ցանկացել է հանդես գալ Հայաստանին ուղղված՝ «կոլեկտիվ գիտակցման» հարցում ներդրում ունենալու մասին կոչով, սակայն կողմերի ելույթները չեղյալ հայտարարվեցին, իսկ այդ արձանագրություններն այդպես էլ չվավերացվեցին երկու երկրների խորհրդարանների կողմից։
