Այսօր առավոտյան մեկնարկած բնապահպանական ակցիան շարունակվեց ՀՀ նախագահի նստավայրի առջև: Այնտեղ բնապահպանները ստորագրեցին այն նամակի ներքո, որը նախապատրաստել էին նախագահին հանձնելու համար: Ինչպես «Առաջին լրատվական»-ի հետ զրույցում տեղեկացրեց բնապահպանական փորձագետ, «Պահպանենք Թռչկանի ջրվեժը» քաղաքացիական նախաձեռնության անդամ Արման Վերմիշյանը` պատրաստել են երկու նամակ:
«Առաջինով պահանջում ենք անվավեր ճանաչել կառավարության 627 որոշումը, իսկ մյուս նամակով նախագահից հանդիպում ենք խնդրում բնապահպանական խնդիրները համատեղ քննարկելու և լուծումներ առաջարկելու նպատակով»,- մանրամասնեց Ա. Վերմիշյանը:
Ակցիայի մասնակիցներին բնապահպան Ապրես Զոհրաբյանը նամակների բովանդակությանը ծանոթացնելուց հետո նախագահականից ներկայացուցիչ եկավ և վերցրեց նամակները: Նամակները գրանցելու նպատակով նրա հետ նախագահական գնացին Արման Վերմիշյանը, բնապահպանության ոլորտում գործող իրավաբան Մերի Խաչատրյանը և «Ժառանգություն» խմբակցության պատգամավոր Զարուհի Փոստանջյանը: Բնապահպանները հույս հայտնեցին, որ կառավարությունը անվավեր կճանաչի չարաբաստիկ 627 որոշումը:
