Կառավարությունը վաղը նիստում նախատեսում է հաստատել ՀՀ-ում վարակիչ հիվանդությունների կանխարգելման և դրանց դեմ պայքարի 2012-2016 թվականների ռազմավարական ծրագիրը:
Վարակիչ հիվանդությունների բեռն աշխարհի բազմաթիվ երկրներում շարունակում է բարձր մնալ: Համաձայն Առողջապահության համաշխարհային կազմակերպության տվյալների տարեկան արձանագրվող հիվանդությունների կառուցվածքում վարակիչ հիվանդությունները կազմում են ավելի քան 40%, որի հիմնական բաժինն ընկնում է մարդու իմունային անբավարարության վիրուսին, տուբերկուլոզին և մալարիային, որոնք աշխարհում տարեկան միլիոնավոր մարդկանց հիվանդանալու և մահվան պատճառ են դառնում: Վարակիչ հիվանդությունների պատճառով մահվան դեպքերի շուրջ 43%-ը բաժին է ընկնում զարգացող երկրներին, իսկ 63%-ը` մանկական ազգաբնակչությանը: Վերջին տարիներին աշխարհում առաջանում են մի շարք նոր հիվանդություններ (ատիպիկ թոքաբորբ, թռչնի գրիպ, խոզի գրիպ և այլն), որոնց դիմակայելու համար մարդկությունը դեռ չի ստեղծել համապատասխան կարողություններ: Վերջին 30 տարում շուրջ 40 նոր հիվանդություն է առաջացել, որոնց 75%-ն ունի կենդանական ծագում:
Ըստ ծրագրի հիմնավորման՝ Հայաստանում վարակիչ հիվանդությունները դեռևս շարունակում են առողջապահական հիմնախնդիր լինել: Տարեկան արձանագրվող հիվանդությունների կառուցվածքում վարակիչ հիվանդությունները կազմում են 5%, մինչև 14 տարեկան երեխաների հիվանդացության կառուցվածքում` 10%, վարակիչ հիվանդություններից տարեկան մահանում է շուրջ 300 մարդ, որոնց հիմնական մասը տուբերկուլյոզից, որը հիմնախնդիր է ամբողջ աշխարհում: Վարակիչ հիվանդություններով շուրջ 11 հազար մարդ ստանում է հոսպիտալային բուժում, վարակիչ հիվանդության ավելի քան 27 հազար տնային և ավելի քան 3 հազար կազմակերպ օջախ է ձևավորվում, որոնք ենթարկվում են համաճարակաբանական հետազոտության:
Ներկայում Հայաստանում վարակիչ հիվանդությունների համաճարակային իրավիճակը լարված չէ: Վերջին տարիներին դիֆթերիայի, ռիկեցիոզների, այդ թվում` համաճարակային բծավոր տիֆի և Բրիլի հիվանդության, սուր պոլիոմիելիտի, կատաղության, դեպքեր չեն արձանագրվել: Հանրապետությունում ժամանակ առ ժամանակ առաջանում են բռնկումներ, որոնք չեն վերածվում համաճարակի:
