Apple ընկերությունը կարող է 2012 թվականի աշնանը ներկայացնել վեցերորդ սերնդի նոր դիզայնով iPhone սմարթֆոններ: Այս մասին հայտնում է BGR կայքը` հղում կատարելով տեղեկացված աղբյուրին:
Պարբերականը նշում է, որ նոր սմարթֆոնի հետևի կափարիչը ապակու փոխարեն լինելու է ալյումինից: Կափարիչը ապակեպատ պանելին միացնող շրջանակը, որը պաշտպանում է դիսփլեյը, լինելու է ռետինից կամ պլաստմասսից: Շրջանակի լրացուցիչ առավելությունը լինելու է անլար կապի ալեհավաքի մեկուսացումը կորպուսի մետաղական մասից:
iPhone-ի դիզայնի փոփոխությունները սպասվում էին դեռ iPhone 4S-ի հայտնվելուց առաջ, որը ներկայացվել էր հոկտեմբերին: Սակայն այս նոր սմարթֆոնը իրականում iPhone 4-ի նորացված տարբերակն է:
Բացի այդ, ոչ պաշտոնական աղբյուրները ենթադրում են, որ Apple-ը կարող է անցում կատարել 4 դյույմ անկյունագիծ ունեցող դիսփլեյով iPhone-ի` 3,5 դյույմանոցի փոխարեն: Այս կանխատեսումները չեն արդարացել iPhone 4S սմարթֆոնների դեպքում, սակայն հնարավոր է, որ իրականություն դառնան 2012 թվականին:
