Այսօր Փխենյանում 4 ժամ ուշացումով սկսվել է Հյուսիսային Կորեայի առաջնորդ Կիմ Չեն Իրի հուղարկավորության արարողությունը: Այս մասին հաղորդում է РИА Новости-ն՝ վկայակոչելով տեղի մամուլը:
Կիմ Չեն Իրի զմռսված մարմինը կդրվի ապակե սարկոֆագի մեջ՝ 1994 թ. մահացած հոր՝ Կիմ Իր Սենի կողքին:
Հյուսիսկորեական առաջատար թերթերից մեկը՝ «Նոդոդն Սիմունը», Կիմ Չեն Իրին է նվիրել մի հոդված նրա «հեղափոխական ժառանգության» մասին: Թերթը որպես այդպիսին համարում է Հյուսիսային Կորեայի սեփական միջուկային զենքը, որը փորձարկվել է երկու անգամ՝ 2006 թ.և 2009 թ.:
Կիմ Չեն Իրի մարմինը զմռսելու համար հրավիրվել են ռուս մասնագետներ, որոնք զբաղվում են Լենինի մարմնի պահպանմամբ: Մահացած առաջնորդի հետ դամբարանում կդրվեն նաև նրա ավտոմեքենան, հատուկ գնացքի վագոնը, հագուստը և գրասենյակը:
Կիմ Չեն Իրը մահացել է դեկտեմբերի 17-ին սրտի կաթվածից: Երկրի ղեկավարի պաշտոնում նրան կփոխարինի կրտսեր որդին՝ Կիմ Չեն Ունը:
