ՀՔԾ հրապարակած զեկույցում Մարտի 1-ի զոհերը ներկայացված են որպես պոտենցիալ հանցագործներ: «Առաջին լրատվական»-ի հետ զրույցում նման տեսակետ հայտնեց Մարտի 1-ի Փաստահավաք խմբի անդամ Անդրանիկ Քոչարյանը` անդրադառնալով ՀՀ հատուկ քննչական ծառայության վարույթում քննվող քրեական գործով նախաքննական մարմնի պատրաստած տեղեկատվական հաղորդմանը:
Ծանոթանալով զեկույցին` նա մեկ անգամ ևս համոզվել է, որ Հայաստանի ամբողջ իրավական համակարգը գտնվում է խոր ճգնաժամի մեջ: Նրա համոզմամբ, նրանք նույնիսկ գործող նախագահի կարգադրությունը ի վիճակի չեն լիարժեք կատարելու: «Ամիսներ առաջ խորհրդակցության արդյունքում իրավապահ մարմիններին և հատուկ քննչական ծառայության համապատասխան քննչական խմբին հանձնարարական էր տրված ավարտին հասցնել Մարտի 1-ի բացահայտման գործընթացը, այն ժամանակ իսկ պարզ էր, որ ոչինչ չի արվելու: Այս զեկույցում, ըստ էության, հաստատվեց, որ իշխանությունները և տվյալ մարմինը բացահայտման ուղղությամբ ցանկություն չունեն որևէ գործողություն կատարելու, քանի որ այս փաստաթղթով ավելի վատ բաներ են կատարել»,- մեկնաբանեց Ա. Քոչարյանը`հավելելով, որ փոխանակ բացահայտմանը, նրանք զոհերին ներկայացրել են որպես պոտենցիալ հանցագործներ:
Ա. Քոչարյանի համոզմամբ, ոչ թե գործողություններ են իրականացված կրակողներին կամ մարդասպաններին բացահայտելու ուղղությամբ, այլ տրված են գնահատականներ, թե զոհերն ինչով են զբաղված եղել: Սրան մարտիմեկյան Փաստահավաք խմբի անդամը նշանակություն չի տալիս: Նրա խոսքով, կատարված է ծանր հանցագործություն. մարդիկ զրկվել են իրենց կյանքից, կյանքի իրավունքից: «Այս նախաքննական մարմինը ցույց տվեց, որ ցանկություն չունի այդ կրակողներին, մարդասպաններին ի հայտ բերելու և հանձնելու Հայաստանի արդարադատությանը»,- ընդգծեց Ա. Քոչարյանը:
Ամփոփելով տարին՝ նա ասաց, որ այն հավաստիացումները, որոնք իշխանությունները տվեցին, սին դուրս եկան, և գալիք տարին շատերին պետք է մտածելու տեղիք տա: Նա հիշեցրեց ՀԱԿ-ի հանրահավաքներից մեկի ընթացքում ՀՀ առաջին նախագահ Լևոն Տեր-Պետրոսյանի այն խոսքը, որ չպետք է ազգը հանդուրժի Մարտի 1-ը: Անդրանիկ Քոչարյանը կիսում է այս կարծիքը և կարծում, որ հանրությունը կգտնի քաղաքական մեխանիզմներ իշխանություններին ստիպելու գնալ Մարտի 1-ի լիարժեք բացահայտման: Նա չի բացառում հանրային դատի ուղղությունը:
Հիշեցնենք, որ Հատուկ քննչական ծառայության կայքէջում հրապարակվել է 2008 թվականի մարտի 1-2-ին մայրաքաղաքում տեղի ունեցած դեպքերի առթիվ ՀՀ հատուկ քննչական ծառայության վարույթում քննվող քրեական գործով նախաքննական մարմնի պատրաստած տեղեկատվական հաղորդումը՝ նախաքննության կատարած աշխատանքների, արդյունքների և խնդիրների վերաբերյալ:
