ԱԺ նախկին նախագահ Հովիկ Աբրահամյանն այսօր Հայաստանի պետական տնտեսագիտական համալսարանում պատասխանելով լրագրողների հարցին, ճեպազրույցում, անդրադառնալով առաջիկա խորհրդարանական ընտրություններին, ասաց, որ իր կարծիքով` ԲՀԿ-ն չի հաղթելու այդ ընտրություններում:
ՀՀԿ-ԲՀԿ միասնական ցուցակի հնարավորությանն անդրադառնալով Հ. Աբրահամյանը նշեց, որ քաղաքականության մեջ չպետք է ոչ մի բան բացառել, թեև նման հարց դեռ չի քննարկվել, սակայն դրա քննարկման պարագայում հանրությունը առաջիկայում դրա մասին կտեղեկանա:
ՀՀԿ-ն, ըստ նրա, ներկայում զբաղված է 2012թ. ընտրությունների նախապատրաստական աշխատանքներով: «Հունվարից սկսած մենք մեծ աշխատանք ենք իրականցնելու, և Հանրապետական կուսակցությունը, այն, ինչ պլանավորել է, ծրագրել է, մենք փորձելու ենք իրականացնել 2012թ. մայիսի խորհրդարանական ընտրություններում»:
Անդրադառնալով մամուլում շրջանառվող այն լուրերին, թե ԱԺ նորանշանակ նախագահ Սամվել Նիկոյանը, թե ԱԺ-ում հայտնաբերել է խախտումներ , վերջինս ասել է, թե բացառում է, որ Նիկոյանը նման հայտարարություն անի, և ինքը բացառում է, որ որևէ խախտում իրականացրած լինի:
«Ամենալավ իրադարձությունն այն է, որ մենք չունենք մեծ կորուստներ, ունենք ձեռքբերումներ, առաջիկայում համոզված եմ, որ ունենալու ենք նաև ազատ, ժողովրդավար ընտրություններ: Գոնե մեր իշխանությունները, ՀՀԿ-ն ձգտում է դրան»,- ասել է նա:
