«Ժառանգություն» կուսակցության վարչությունն ու Հայ Յեղափոխական Դաշնակցություն (ՀՅԴ) կուսակցության գերագույն մարմինը համատեղ հայտարարություն են տարածել:
Ստորև ներկայացնենք այն.
«Հայ Յեղափոխական Դաշնակցությունը և «Ժառանգություն» կուսակցությունները 2008-2011թթ. նախաձեռնեցին Ընտրական օրենսգրքի իրական և արմատական բարեփոխմանն ուղղված քայլեր` Ազգային ժողովի կողմից համապատասխան փոփոխություններն ընդունելու նպատակով:
Վերահաստատելով դրանց ամբողջական իրականացման ուղղությամբ մեր պատրաստակամությունը եւ կարեւոր նշանակություն տալով ընտրական գործընթացների նկատմամբ լայն վերահսկողության ապահովման համար ուժերի համադրմանը, ստեղծված պայմաններում հանդես ենք գալիս հետևյալ համատեղ հայտարարությամբ.
– կարևորելով Հայաստանի ապագայի համար առաջիկա խորհրդարանական ընտրությունների բացառիկ նշանակությունը և դրանց արդյունքների հանդեպ հասարակության վստահության մեծացումը,
– նշելով, որ ՀՅԴ-ի և «Ժառանգության»` ցայժմ ԱԺ-ում ներկայացված և ԵԽԽՎ Վենետիկի հանձնաժողովի փորձաքննությանն ուղարկված առաջարկություններում ամփոփված են ընտրական իրավունքի պաշտպանության գաղափարի շուրջ միավորված մի քանի տասնյակ հասարակական կազմակերպությունների` ՀՀ Ընտրական օրենսգրքի բարեփոխման վերաբերյալ առաջարկները,
– ապահովելու համար պատգամավորական բոլոր մանդատների համարժեքությունն ու համապետականությունը և մեծացնելու քաղաքական ուժերի պատասխանատվությունը ընտրական գործընթացի ու խորհրդարան մուտք գործող անձանց համար,
– խնդիր ունենալով յուրաքանչյուր ընտրողի համար մեծացնել սեփական իշխանությունները ձևավորելու հարցում իր քվեի նշանակությունը,
– ձգտելով հասնել հավասար մրցակցային պայմանների ապահովմանը,
– նվազեցնելու համար ընտրական գործընթացների վրա ոչ քաղաքական և ոչ ընտրական գործոնների ազդեցությունը,
– ազատ և արդար ընտրություններ անցկացնելու հարցում ընտրությունների նախաշեմին հասնելու համար քաղաքական բոլոր ուժերի համախոհությանը,
«Ժառանգություն» և Հայ Յեղափոխական Դաշնակցություն կուսակցությունները.
– Ողջունում են խորհրդարանական և արտախորհրդարանական ուժերի վերջերս հայտարարած դիրքորոշումը` ազատ ու արդար ընտրությունների կազմակերպման և վերահսկման հարցում:
– Ազգային ժողովի մեծամասնությանն առաջարկում են Ընտրական օրենսգրքում համատեղ իրականացնել մեկ կոնկրետ փոփոխություն, այն է` վերացնել մեծամասնական ընտրակարգը` անցում կատարելով 100 տոկոսանոց համամասնական ընտրակարգի, և գտնում են, որ համաձայնելով այս քայլին, իշխանությունները ցույց կտան իրենց պատրաստակամությունն ու քաղաքական կամքը` նախընտրական շրջանում ընդդիմության հետ համատեղ երկրում ձևավորելու ներհասարակական հանդուրժողականության և համերաշխության մթնոլորտ:
– Կոչ են անում բոլոր քաղաքական ուժերին` պաշտպանել այս նախաձեռնությունը»: