Ադրբեջանական APA լրատվական գործակալությունը, վկայակոչելով կառավարության մեջ ունեցած իր աղբյուրին, հայտնում է, որ Ադրբեջանը չի թույլատրել իր օդային տարածքով ՆԱՏՕ-ի հետախուզական ինքնաթիռների թռիչքները։ Խոսքը վաղ զգուշացման և վերահսկման համակարգով զինված AWACS (Airborne Warning And Control System) ինքնաթիռների մասին է։
Աղբյուրը նշել է, որ ոչ վաղ անցյալում ՆԱՏՕ-ն պաշտոնապես դիմել է Վրաստանին ու Ադրբեջանին՝ նրանց օդային տարածքով Եվրոպայից դեպի Աֆղանստան իր AWACS-ների թռիչքների թույլատրման համար։ Չնայած Վրաստանը պաշտոնապես համաձայնել է դրան, Ադրբեջանը նման թույլտվություն չի տվել։
Փոխարենը, Ադրբեջանը համաձայնել է իր օդային տարածքը տրամադրել միայն այն ինքնաթիռներին, որոնք բեռներ են փոխադրում դեպի Աֆղանստան։ AWACS-ների թռիչքների մերժման հարցում Ադրբեջանն իր որոշումը պայմանավորել է նրանով, որ դրանք հանդիսանում են ռազմա-հետախուզական ինքնաթիռներ։
Նշվում է, որ ամենաժամանակակից տեխնիկայով հագեցած ամերիկյան AWACS-ները համարվում են «թռչող ռադարներ», նրանք կարող են թշնամական և բարեկամական ինքնաթիռներին նկատել և տարբերակել հարյուրավոր կիլոմետր հեռավորության վրա։ Օդային լիցքավորման շնորհիվ AWACS-ները կարող են օդում մնալ 24 ժամ շարունակ, դրանք կարող են միանգամից հստակեցնել 2000 ինքնաթիռների գտնվելու վայրը, դրանց թռիչքի բարձրությունը, արագությունը, ինչպես նաև հետևել դրանց թռիչքների ընթացքին։
