Լիբանանի «Ազդակ» օրաթերթի գլխավոր խմբագիր Շահան Գանդահարյանը, անդրադառնալով հարցին, թե ինչ ազդեցություն կարող են ունենալ սփյուռքահայերի («Փարիզյան սուրճ» ընկերության սեփականատեր, ֆրանսահայ գործարար Վալերի Գործունյան, ինչպես նաև «Նարեկացի» արվեստի միության նախագահ Նարեկ Հարթունյան) նկատմամբ կիրառված ճնշումները, նկատեց, որ հետևելով լրատվության միջոցներով հրապարակված դեպքերին, խնդիրը միայն սփյուռքահայերին չի վերաբերում։
«Նման հարցերը, կարծում եմ, հարկ է դիտարկել ներդրումային դաշտի ներկա իրավիճակի օբյեկտիվ գնահատականի լույսի ներքո`եզրակացնելու համար, թե այս պահի դրությամբ որքանո՞վ ապահով է մեր ներդրումային դաշտը, որքանո՞վ է գործում օրենքը այնտեղ և ի՞նչ համեմատություններով են աճում կամ կրճատվում ներդրումները մեր երկրում»,- ասաց Շ. Գանդահարյանը։
Նրա կարծիքով`նմանատիպ դեպքերը բացասական ազդեցություն կունենան ներդրումային դաշտի վրա։ «Այսուհանդերձ, այստեղ անհրաժեշտ եմ գտնում հետևողական աշխատանք տանել իրավական պետության կայացման համար, որտեղ հստակ կանոնակարգված կլինեն առևտրի, գործարարության կամ առհասարակ ներդրումային ոլորտները։ Օրենքների թափանցիկությունը և ճիշտ կիրառումը կարող են վաստակել վստահություն հանդեպ մեր երկրին»,- ավելացրեց Շահան Գանդահարյանը։
Հարցերը, նրա խոսքերով, փոխկապակցված են։ Տնտեսական զարգացումը նպաստում է արտագաղթի կրճատմանը, հայրենադարձության քաջալերանքին և ընդհանրապես ժողովրդագրական պատկերի կայացմանը։ Օրենքի երկկողմանի հարգումը հրամայական է։ Այսինքն`ինչպես պետությունը, այնպես էլ հասարակությունը կամ ներդրող գործարարը պետք է հարգեն օրենքը։
Իրավական պետության կայացումը միակ ճանապարհն է հարցերի կարգավորման համար։
