ՀՀ փոխվարչապետ, տարածքային կառավարման նախարար Արմեն Գևորգյանն այսօր մեկնել է Շիրակի մարզ` այցն սկսելով Աշոցքի տարածաշրջանից:
Աշոցքի համայնքապետարանում տարածաշրջանի համայնքների ղեկավարների մասնակցությամբ անցկացված խորհրդակցության ընթացքում քննարկվել են սեփական եկամուտների հավաքագրմանը, ընթացիկ խնդիրներին առնչվող հարցեր: Հաշվի առնելով, որ համայնքներում արձանագրվել է եկամուտների հավաքագրման` միջինից ցածր մակարդակ, փոխվարչապետը հորդորել է քայլեր ձեռնարկել ցուցանիշների բարելավման ուղղությամբ: Քննարկվել են նաև համայնքապետերի կողմից հողօգտագործմանը, հարկային վարչարարության օրենսդրության կիրառման առանձնահատկություններին վերաբերող հարցեր:
Փոխվարչապետին զեկուցվել է նաև մարզի առաջնահերթ խնդիրների լուծման ծրագրի ընթացքի մասին. ծրագրի առաջին մասով նախատեսված աշխատանքներն ամբողջությամբ ավարտվել են, երկրորդ մասով ևս որոշակի միջոցառումներ իրականացվել են, և աշխատանքները կշարունակվեն գարնանը: Համայնքի ղեկավարները բարձրացրեցին միջհամայնքային ճանապարհների` ձմեռային շրջանում պահպանության խնդիրը, ինչն առաջնահերթ է` հաշվի առնելով տարածաշրջանի խիստ եղանակային պայմանները: Այդ նպատակով նրանք լրացուցիչ օժանդակություն են ակնկալում կառավարությունից: Փոխվարչապետը տեղում ծանոթացավ նաև համայնքում «Հայաստան» հիմնադրամի կողմից կառուցվող դպրոցի շինաշխատանքների ընթացքին: Նշվեց, որ աշխատանքները կավարտվեն 2013թ. գարնանը:
Մարզպետ Ա. Գիզիրյանի ուղեկցությամբ փոխվարչապետը եղավ նաև Մայիսյան համայնքում, ծանոթացավ նորակառույց մշակույթի տան պայմաններին: Մարզի առաջնահերթ խնդիրների լուծման ծրագրի առաջին մասով համայնքում նոր մշակույթի տան կառուցման նպատակով հատկացվել էր 160 մլն դրամ, ծրագրի երկրորդ մասով`ևս 12 մլն դրամ` բարեկարգման համար: Աշխատանքներն արդեն ամբողջությամբ ավարտված են, և փոխվարչապետին զեկուցվեց, որ մշակույթի տունը պատրաստ է շահագործման: Նշենք, որ համայնքի մշակույթի տունը փլուզվել էր 1988թ. երկրաշարժի ժամանակ:
Շիրակի մարզպետարանում առողջապահության նախարար Հարություն Քուշկյանի մասնակցությամբ քննարկվել են մարզում առաողջապահական հաստատությունների ներկա վիճակին, դրանց արդիականացմանն առնչվող հարցեր: Քննարկվել են նաև ընթացիկ այլ խնդիրներ:
Փոխվարչապետը, առողջապահության նախարարի, մարզպետի և Գյումրիի քաղաքապետի ուղեկցությամբ եղել է նաև Գյումրիի նոր բժշկական կենտրոնի շինհրապարակում, ծանոթացել կատարվող աշխատանքների ընթացքին:
Նոր բժշկական կենտրոնը կառուցվում է ՀԲ կողմից ֆինանսավորվող «Առողջապահության համակարգի արդիականացում» ծրագրի շրջանակում: Շինարարական աշխատանքները մեկնարկել են 2010թ. սեպտեմբերին: Շինարարությունն իրականացնող ընկերության ղեկավարները տեղեկացրեցին, որ աշխատանքները նախատեսվում է ավարտել 2012թ ապրիլի վերջին: Ստեղծվելու է արդի բազմապրոֆիլային բժշկական կենտրոն` լայն ախտորոշիչ հնարավորություններով, վերազինված ժամանակակից սարքավորումներով: Ներդրումների ընդհանուր ծավալը կազմում է 4,6 մլրդ դրամ:
Փոխվարչապետը ներկա է գտնվել նաև Գյումրիի տարածքային հարկային տեսչության սպասարկման կենտրոնի բացման արարողությանը, որին մասնակցում էին ՊԵԿ նախագահ Գագիկ Խաչատրյանը, մարզային և համայնքային իշխանությունների ներկյացուցիչներ: Հիմնանորոգված կենտրոնը սպասարկելու է Գյումրիի, Ամասիայի, Աշոցքի և Ախուրյանի ավելի քան 3800 գործող հարկ վճարողների: Նոր պայմանները հնարավորություն կընձեռեն նվազեցնել հարկային տեսուչ-հարկատու շփումը, կենտրոնում գործելու է մեկ պատուհանի սկզբունքը: Հյուրերը շրջայց են կատարել կենտրոնում, ծանոթացել ստեղծված պայմաններին և հնարավորություններին:Այս մասին «Առաջին լրատվական»-ին տեղեկացնում է Տարածքային կառավարման նախարարության հասարակայնության հետ կապերի բաժնից:
