Toyota Motor-ը ներկայացրել է հիբրիդային շարժիչով նոր ավտոմեքենա, որը ավելի քիչ վառելիք է օգտագործում, քան այդ տեսակի այլ մեքենաները: Այդ կերպ ընկերությունը ձգտում է առաջատար դիրքեր գրավել մաքուր էլեկտրամեքենաների մրցակցության շրջանում:
Ինչպես նշում է Reuters գործակալությունը, կոմպակտ դասի մեքենաները, որ Ճապոնիայում ստացել են Aqua, իսկ այլ շուկաներում՝ Prius C անվանումը, 35,4 կիլոմետրն անցնում են մեկ լիտր բենզինով:
Nissan Motor Co և General Motors Co GM.N մրցակիցները պլանավորում են շրջակա միջավայրի արժեքը գնահատող գնորդների ուշադրությունը հրավիրել իրենց Leaf և Chevrolet Volt էլեկտրական մեքենաների վրա, չնայած այդ տեսակի ավտոմեքենանաների վաճառքը դժվար թե բարձր պահանջարկ ունենա, քանի դեռ բարձր է նրանց մարտկոցների գինը:
Toyota-ն հայտարարել է, որ Ճապոնիայում Aqua-ի վաճառքը մեկ ամսում հասցնելու է 12 հազարի: Մեքենայի նախնական գինը 21,600 դոլար է:
2015 թվականին ճապոնական ավտոարտադրողը, որը առաջատար դիրքեր է զբաղեցնում հիբրիդային շարժիչով ավտոմեքենաների շուկայում, մտադիր է թողարկել մոտ 10 նոր բենզինաէլեկտրական մոդել:
Հիշեցնենք, որ օրերս Toyota Motor Corp. ընկերությունը հայտարարել էր, որ այս տարի նրա վաճառքն ամբողջ աշխարհում նվազելու է 6 տոկոսով` ընդհանուր առմամբ 7,9 միլիոն մեքենա: Ընկերությունը դա բացատրում է Ճապոնիայում և Թաիլանդում այս տարի տեղի ունեցած տարերային աղետների պատճառած վնասներով:
