Հայաստանն ու Իրանը վաղուց են համագործակցում ու զարգացնում համագործակցությունը, որովհետև Իրան-Հայաստան հարաբերությունները ձևավորվում են փոխշահավետ համագործակցության վրա: Կան նաև ընդհանուր հետաքրքրություններ տարածաշրջանում, կա շրջափակումից դուրս գալու երկկողմանի խնդիր: Անդրադառնալով երեկ Հայաստանի ու Իրանի նախագահների կողմից ընդունված համատեղ հայտարարությանն ու դրանից բխող տարածաշրջանային զարգացումներին` «Առաջին լրատվական»-ի հետ զրույցում ասաց իրանագետ Մհեր Բաղդասարյանը:
Նրա խոսքով, բացի դրանից` Հայաստանն ունի նաև Ադրբեջանի հետ խնդիրներ, վերջերս ավելի սուր է ձևավորվում Իրան-Ադրբեջան տարաձայնություն-հակամարտություն կոչվածը: Հաշվի առնելով տարածաշրջանային վերջին զարգացումներն ու Արևմուտքի կողմից հակաիրանական մոտեցումները՝ այդ համատեքստում, բնականաբար, Իրանին ձեռնտու է Հայաստանի հետ հարաբերությունների բարելավումն ու առավել զարգացումը:
«Ու ինչպես երեկ նրանք նշեցին, բավական ելքեր կան այդ զարգացումն առավել խորացնելու համար, որովհետև մեր երկիրն էլ լավ վիճակում չի հայտնվի Իրանի դեմ գործողություններ սկսելու դեպքում: Հայաստանն առանց այդ էլ շրջափակումից տուժում է»,- նշեց իրանագետը` ընդգծելով, որ հենց դա է պատճառը, որ երկու երկրների նախագահները համատեղ հայտարարությամբ են հանդես գալիս:
«Էներգետիկ ոլորտում համագործակցությամբ, երկաթգծի կառուցմամբ Իրանը նպատակ ունի դուրս գալ շրջափակումից ու բնականաբար Հայաստանն ավելի կթեթևացնի Թուրքիայի ու Ադրբեջանի կողմից շրջափակման քաղաքականությունը»,- նշեց Մ. Բաղդասարյանը` հավելելով, որ երկու երկրների հարաբերություններում ամեն ինչ «փոխկապակցված է»:
Նրա խոսքով` Իրան-Հայաստան հարաբերություններում միակողմանի փոխշահավետ համագործակցություն չկա:
