Հայաստանի համար գազի գինը ՀՀ էներգետիկայի և բնական պաշարների նախարարը չի թանկացնում, և այս հարցում ավելի հիմնավոր են ռուսական կողմի հայտարարություններն ու գործողությունները, իսկ ռուսական կողմը բազմիցս հայտարարել է, որ ՀՀ համար գազի գինը պետք է հավասարեցվի միջազգային մակարդակին: «Առաջին լրատվական»-ի հետ զրույցում կառավարման փորձագետ Հարություն Մեսրոբյանը զարմանք հայտնեց մեկ այլ հարցի շուրջ՝ ինչո՞ւ Հայաստանում գազի գները չեն իջնում. չէ՞ որ Հայաստանը սահմանին գազը ստանում է մի գնով, իսկ վաճառում՝ մեկ այլ գնով, գրեթե 1/2-ի չափով:
«Այս դեպքում ավելի կարևոր է, թե ինչո՞ւ հայկական կողմը քայլեր չի ձեռնարկում բնակչության համար գազի գինն իջեցնելու ուղղությամբ: Առավել ևս, որ պաշտոնական տվյալներով, աղքատների թիվն անցել է 35%-ի սահմանը՝ ճգնաժամի արդյունքում գրեթե կրկնապատկվելով: Հետևապես, եթե մենք սոցիալական պետություն ենք, գազի գնի էժանացում պետք է անեն»,- նշեց Հ. Մեսրոբյանը:
Միաժամանակ, նա չբացառեց, որ եթե անգամ ռուսական կողմը գազը թանկացնի, ընտրությունների նախաշեմին դա կկոմպենսացվի «ՀայՌուսգազարդի» մարժայի հաշվին:
