«Հրապարակ»-ը փորձել է տարեվերջին ամփոփիչ մեկնաբանություններ ստանալ ոստիկանապետից:
«Վովա Գասպարյանը զերծ մնաց ողջ տարվա կտրվածքով ամփոփիչ գնահատական տալուց: Մեր հարցին, թե որն է ոլորտի այս տարվա գլխավոր իրադարձությունը` և՛ բացասական, և՛ դրական առումով, պատասխանեց. «Լավն այն է, որ լավն այնուամենայնիվ շատ է, քան վատը: Իսկ վատն այն է, որ դեռ չենք հասցրել կառուցել ցանկալի ոստիկանություն»:
Թերթի հարցին, թե կարելի՞ է ասել, որ գալիք տարին համազգեստավորների համար ծանր է լինելու` հաշվի առնելով, որ 2012-ն ընտրական է, և թեժ պայքար է սպասվում կուսակցությունների միջև, ասել է.
«Չեմ կարծում, որ դժվար է լինելու, իսկ կուսակցությունների պայքարի թեժությունը մենք դիմավորելու ենք սառնասրտությամբ, օբյեկտիվությամբ և արդարությամբ»:
Ինչ վերաբերում է ամանորյա տոնական գիշերվան, ապա այն, պարզվում է, տարբերվելու է բդապաշտ չինովնիկների գիշերվանից:
«Ես դիմավորում եմ Ամանորը ինչպես քրիստոնյա, Հայ առաքելական եկեղեցու խոնարհ մարդ: Ժամը 12-ին իմ ընտանիքի հետ լինելու եմ եկեղեցում, ինչպես միշտ, և մինչև Տիրոջ ծնունդը պահքով…: Սեր և խաղաղություն, հավատ առ Աստված և խոնարհություն»,-ամանորյա բարեմաղթանքով զրույցն ավարտել է ոստիկանապետը:
