«Ժողովուրդ»-ը գրում է, որ կառավարությունը շտապել է սրբագրել դեկտեմբերի 15-ի իր հայտնի որոշումը՝ Ամանորի կապակցությամբ սոցիալապես անապահով ընտանիքներին 3-ական շիշ բուսական յուղ տրամադրելու մասին:
«Կառավարության որոշման նախագծում մինչև երեկ գրված էր, թե ՌԴ-ն 2009թ. Հայաստանին որպես մարդասիրական օգնություն ձեթ էր տրամադրել: Եվ այդ ձեթն էլ իրենք վաճառքի դնելուց ու չվաճառվելուց հետո որոշել են բաժանել աղքատներին: Բայց որպեսզի ծածկեն երեք տարի առաջ տրամադրված ձեթի ժամկետանց լինելու հանգամանքը, կառավարության որոշման մեջ փոփոխություններ կկատարեն՝ այնտեղ գրելով որ բուսական յուղը տրամադրվել է 2010-ին: Եթե մինչ այս պնդում էին՝ ոչ թե ձեթն է ժամկետանց, այլ փաստաթուղթը, հիմա ստացվում է՝ երկուսն էլ ժամկետի մեջ են»,- ապա թերթը հավելում է.
Միայն ափսոս, որ դժվար թե որևէ մեկը հավատա դրան: Ի վերջո, ՀՀ կառավարությունը չէր կարող սխալ ամսաթվով որոշում ընդունել, որը «ժողովուրդ»-ի հրապարակումից հետո հեշտությամբ փոխվեց»:
