Ադրբեջանական 1news.az-ի փոխանցմամբ, Ադրբեջանի նախագահ Իլհամ Ալիևն այսօր ընդունել է Իրաքի արտգործնախարար Հոշիյար Զիբարիին։ Ալիևի հետ հանդիպման ժամանակ Զիբարին կարևորել է Իրաքում Ադրբեջանի դեսպանատուն բացելու անհրաժեշտությունը, ինչը կնպաստի երկկողմանի հարաբերությունների զարգացմանը։
Զիբարին, հիշեցնելով, որ ադրբեջանցի զինծառայողները խաղաղապահ գործողություններ են իրականացրել Իրաքում, հայտարարել է, որ Իրաքը կողմ է արտահայտվել ՄԱԿ-ի ԱԽ-ին Ադրբեջանի ոչ մշտական անդամակցությանը։ Ղարաբաղյան հակամարտության կարգավորման հետ կապված՝ Զիբարին կարևորել է դիվանագիտական ճանապարհով կարգավորումը։
Զիբարիին ընդունել է նաև արտգործնախարար Էլմար Մամեդյարովը։ Հանդիպման ժամանակ կողմերը համաձայնության են եկել քաղաքական խորհրդակցությունների անցկացման և էներգետիկ համագործակցության զարգացման շուրջ։ Մամեդյարովը վստահեցրել է, որ Իրաքում Ադրբեջանի դեսպանատունը բացվելու է 2012 թվականին։
