ԱՄՆ-ին հաջողվել է համաձայնություն ձեռք բերել «Թալիբան»-ի հետ, սակայն բանակցությունները դադարեցվել են Աֆղանստանի նախագահ Համիդ Կարզայի առարկությունների պատճառով: Այս մասին գրում է The Washington Post թերթը ՝ վկայակոչելով ամերիկացի և եվրոպացի պաշտոնյաների, որոնց անունները չեն հաղորդվում:
Ըստ նոյեմբերին ձեռք բերված համաձայնության՝ ԱՄՆ-ը պետք է հանձներ Կուբայի Գուանտանամո բազայում պահվող 5 թալիբ պատանդներին, փոխարենը Թալիբանը հրապարակավ պետք է դատապարտեր միջազգային ահաբեկչությունը: Առաջին անգամ նման հնարավոր գործարքի մասին դեկտեմբերի 19-ին հայտնել է Reuters գործակալությունը:
Սակայն Կարզայը, ինչպես գրում է The Washington Post-ը, հրաժարվել է աջակցել այդ համաձայնությանը: Թերթի զրուցակիցների տվյալներով՝ նրան չի հաջողվել այդ հարցում համաձայնության գալ աֆղան ազդեցիկ առաջնորդների հետ: Այդ բանակցությունների տապալումն արագացել է Աֆղանստանի նախկին նախագահ Բուրհանուդդին Ռաբբանիի սպանությունից հետո, որը պատասխանատու էր բանակցությունների համար:
Թերթի տվյալներով՝ ԱՄՆ-ի և թալիբների միջև բանակցությունները շարունակվել են շուրջ մեկ տարի: Ակնկալվում է, որ դրանք կվերսկսվեն 2012 թ. սկզբին: Թալիբների պատվիրակությունը գլխավորում է շարժման առաջնորդ Մուհամմեդ Օմարի օգնականը՝ Տայիբ Աղան:
ԱՄՆ-ը թալիբների դեմ պատերազմը սկսել է 2001 թ. հոկտեմբերին այն բանից հետո, երբ նրանք հրաժարվեցին հանձնել «Ալ-Քաիդա»-ի առաջնորդ Ուսաման բեն Լադենին: