Հայաստանում աշխատող 25 գիտական խմբեր 2012թ.-ին կստանան Հայկական ազգային գիտակրթական հիմնադրամի (ՀԱԳԿՀ, Armenian National Science and Education Fund – ANSEF) դրամաշնորհներ` յուրաքանչյուրը 5000-ական ԱՄՆ դոլարի չափով:
Հաղթողներն ընտրվել են ՀԱԳԿՀ հանձնաժողովի կողմից` անկախ գրախոսողների կարծիքների հիման վրա: Նրանց թվում են 16 խմբեր ՀՀ Գիտությունների ազգային ակադեմիայի ինստիտուտներից, 6` Երևանի պետական համալսարանից և 1-ական` Հայկական պետական ճարտարագիտական համալսարանից, Հայկական պետական բժշկական համալսարանից և Հայկական ճարտարագիտական ակադեմիայից:
Ամենաշատ դրանաշնորհներ ստացել են ՀՀ ԳԱԱ Ֆիզիկական հետազոտությունների ինստիտուտի (6), ՀՀ ԳԱԱ Բյուրականի աստղադիտարանի (3), ՀՀ ԳԱԱ Մոլեկուլային կենսաբանության (2) և ՀՀ ԳԱԱ Կենսաքիմիայի ինստիտուտների (2) գիտական խմբերը:
ՀԱԳԿՀ հիմնադրվել է 2000թ. ԱՄՆ հայ մտավորականների կողմից, գործում է Հայ օգնության հիմնադրամի շրջանակներում և սկսած 2001-ից տարեկան 25-ական դրամաշնորհ է տրամադրում Հայաստանում աշխատող գիտական խմբերին։
Մինչ օրս ՀԱԳԿՀ տրամադրել է 300 դրամաշնորհ, որոնցից օգտվել է մոտ 550 հայ գիտնական, այդ թվում` բազմաթիվ երիտասարդ գիտաշխատողներ։
Դրամաշնորհներն օգտագործվել են աշխատավարձերի, սարքավորման ձեռքբերման, գործուղումների և գիտական գործունեությունն ապահովող այլ ծախսերի համար:
ՀԱԳԿՀ դրամաշնորհների արդյունքում զգալիորեն ակտիվացել է գիտական խմբերի գործունեությունը. ստացվել են բազմաթիվ նոր արդյունքներ, տպագրվել են հարյուրավոր նոր գիտական հոդվածներ, հաստատվել են նոր համագործակցություններ: