Գիտնականները, ովքեր ուսումնասիրում են Երկիր մոլորակի ուղեծրում գտնվող արբանյակները, արել են մի զարմանալի հայտարարություն, ըստ որի՝ Երկիրը ցանկացած ժամանակ իր ուղեծրում պտտվող մի քանի լուսիններ ունի:
Հայտարարությունն արվել է MIT Technology Review-ի կողմից:
Հավայան կղզիների համալսարանի գիտնական Մայքլ Գրանվիկն իր գործընկերների հետ երկրի ուղեծրում 2006 թվականին առաջին անգամ մի առեղծվածային տիեզերական մարմին էր հայտնաբերել: Այդ մարմինն անվանվել էր RH120: Պարզվեց, որ այն աստերոիդ էր, և ավելին՝ մեր Լուսնի պես բնական արբանյակ էր:
Այդ ժամանակվանից ի վեր աստղագետներն ուսումնասիրում են նման մարմինները և փորձում հասկանալ, թե որքան է Երկրի ուղեծրում լինելու դրանց հաճախականությունը և տևողությունը:
Օրինակ՝ RH120 աստերոիդը գտնվել է Երկրի ուղեծրում 2006 թվականի սեպտեմբերից մինչև 2007 թվականի հունիսը:
Հետազոտություններից հետևություններ անելով՝ գիտնականները հայտնում են, որ ցանկացած պահի Երկրի ուղեծրում գտնվում են մի քանի լուսիններ, որը նշանակում է, որ այս պահին ևս Երկրի ուղեծրում պտտվող ինչ-որ գաղտնի լուսին կա: Տիեզերական նման մարմինները, ըստ գիտնականների, Երկրի ուղեծրում մնում են հիմնականում 10 ամիս:
Discovery News-ը գրում է, որ, հաշվի առնելով այն փաստը, որ այս աստերոիդներն ընդամնեը մեկ կամ երկու մետր տրամագիծ ունեն, դժվար է նրանց «լուսին» անվանել, բայց նման հայտնագործության գիտական արժեքները բավականին շատ են:
