Երկրում ինչ-որ բաներ փոփոխվում են, ինչ-որ տեղ առաջ ենք գնում նաև, բայց դանդաղ է ամեն ինչ առաջ գնում: Ուզում ենք արագ փոփոխություններ, որպեսզի այդ բարեփոխումները նկատելի լինեն բոլոր ոլորտներում: Մեզ մոտ ամեն ինչ դանդաղ է առաջ գնում, ինչից էլ կորուստներ ենք ունենում:
«Առաջին լրատվական»-ի հետ զրույցում ասաց Սունդուկյանի անվան ազգային ակադեմիական թատրոնի դերասան Տիգրան Ներսիսյանը:
Նրա խոսքով, եթե այլ վայրերում ինչ-որ հարցի լուծման համար մի քանի ամիս է անհրաժեշտ, ապա մեզանում տարիներ են անհրաժեշտ, ինչը չի կարող լավ բանի հանգեցնել: Հարցին` ովքե՞ր կամ ի՞նչն է այդ դանդաղ գործընթացների պատճառը, Տ. Ներսիսյանը պատասխանեց, որ դա բոլորիս մեղքն է, բայց ավելի կոնկրետ` այն մարդկանց, որոնք չեն ընդառաջում փոփոխություններին` վախենալով կորցնել իրենց պաշտոնը:
«Տեսնում ենք, որ մի տեղ փողոց են քանդում: Մարդիկ կան, որ ասում են`ինչի՞ են քանդում, դե լավ էր էլի… հարմարվող են, ասում են` լավ ա էլի»,- զայրացած ասաց դերասանը` ընդգծելով, որ նույն բանը կատարվում է կյանքի գրեթե բոլոր ոլորտներում:
