Այն հիստերիան և աղմկոտ արձագանքը, որ ֆրանսիական Սենատում Հայոց ցեղասպանության հերքման համար քրեական պատասխանատվություն նախատեսող օրինագծի առնչությամբ առկա են Թուրքիայում, թույլ է տալիս ենթադրել, որ օրինագծի ընդունման հավանականությունը բավական մեծ է: «Առաջին լրատվական»-ի հետ զրույցում նման տեսակետ հայտնեց քաղաքագետ Ստեփան Գրիգորյանը:
«Չի բացառվում, որ Ֆրանսիան Հայաստանի հետ կապված հարցերում Թուրքիայից ինչ-որ զիջումներ պետք է ստանա և Ցեղասպանության հարցն օգտագործելով՝ փորձում է Թուրքիային ստիպել այլ հարցերում ինչ-ինչ քայլեր անել: Սա այն լծակն է, որի միջոցով Ֆրանսիան ուզում է որոշ հարցեր լուծել: Ֆրանսիան ցանկանում է ժամանակ շահել, Թուրքիային ժամանակ տալ: Միաժամանակ, չի բացառվում, որ Թուրքիան ցանկանում է հաճոյանալ ինչպես հայկական, այնպես էլ թուրքական կողմերին, որպեսզի երկու կողմերն էլ ինչ-որ տեղ բավարարված լինեն, և այդ փաստն ընտրությունների ժամանակ շատ տեղին օգտագործվի:
Եթե Թուրքիան չկատարի Ֆրանսիայի ուզածը, վաղն այդ օրինագիծն անպայման կընդունվի Սենատում: Թե որ ուզածը, ես չգիտեմ, բայց հաստատ է, որ Ֆրանսիան ինչ-որ բան ուզում է Թուրքիայից: Դրանք, հավանաբար, գլոբալ վերադասավորումների հետ կապված հարցեր են: Ֆրանսիան ինչ-որ բան է ուզում Թուրքիայից, և եթե Թուրքիան դա նրան չտա, օրինագիծը կընդունվի»,- ամփոփեց քաղաքագետը:
Նշենք, որ Ֆրանսիայի Սենատի անդամ, սոցիալիստական կուսակցության ներկայացուցիչ Ֆիլիպ Կալտենբախը, նոյեմբերի 21-ին, Սենատի օրակարգ էր վերադարձրել Հայոց ցեղասպանության հերքման համար քրեական պատասխանատվություն նախատեսող օրինագիծը: Այն քվեարկության կդրվի դեկտեմբերի 22-ին: Նշենք նաև, որ Ֆրանսիայի Սենատը մայիսի 4-ին 196 դեմ և 74 կողմ ձայներով մերժել էր Հայոց ցեղասպանության ժխտումը քրեականացնող օրենքի նախագիծը:
