Այս տարի գրանցվել է ինքնասպանության 103, իսկ ինքնասպանության փորձի՝ 235 դեպք: Այս մասին «Առաջին լրատվական»-ին հայտնեցին Ազգային վիճակագրական ծառայությունից` հավելելով, որ դրանք հունվար-սեպտեմբեր ամիսների տվյալներն են: «Անցյալ տարի նույն ժամանահատվածում եղել է ինքնասպանության 138, իսկ փորձի՝ 179 դեպք»,- տեղեկացրին Ազգային վիճակագրական ծառայությունից:
Ըստ հոգեբանական գիտությունների դոկտոր, ՀՊՄՀ զարգացման և կիրառական հոգեբանության ամբիոնի վարիչ, հոգեթերապևտ, հոգեբան Սամվել Խուդոյանի` ինքնասպանությունների առաջին դրդապատճառը գոյության ճգնաժամն է: «Դրա է հիմնական պատճառներից մեկը կյանքի իմաստազրկումն է, մեծ քաղաքներին բնորոշ մենակությունը, մարդու քաղաքակրթությանը բնորոշ մենակությունը, կյանքի անիմաստության զգացողությունը, հոգեկան այն անհավասարակշիռ վիճակը, որը ստեղծվում է ընդհանուր կյանքի անորոշությունից»,- մեկնաբանեց հոգեբանը` մանրամասնելով, որ դա պատահում է, երբ հասարակությունը փոխակերպվում է, փոխվում են նախկին արժեքները:
Նա հիշեց, որ կար ժամանակ, երբ գիտությունն արժեք էր, և մարդն իր կյանքի իմաստը տեսնում էր գիտության մեջ: «Հիմա գիտությունն արժեզրկվել է, այն մարդկանց կյանքը, ովքեր արժևորում էին գիտությունը, նույնպես արժեզրկվել է: Դա կարող է ինքնասպանության պատճառ հանդիսանալ»,- նշեց Ս. Խուդոյանը` հավելելով, որ մարդ չի կարողանում իրեն գտնել այս աշխարհում:
Այն հարցին, թե ի՞նչն է նպաստում ինքնասպանությունների տարածմանը, հոգեբանը պատասխանեց, որ
նպաստում են նաև լրատվամիջոցները: Նրա համոզմամբ` եթե անընդհատ խոսվում է այս երևույթների մասին և ասվում է, որ դա օրինաչափություն է, մարդկանց կողմից հենց այդպես էլ ընկալվում է:
Անդրադառնալով ինքնասպանությունների տարիքային շեմին` հոգեբան Սամվել Խուդոյանը նշեց, որ ամբողջ աշխարհում ամենախոցելի տարիքը պատանեկությունն է: «Այնուհետև միջին տարիքի տղամարդիկ և կանայք: Ավելի շատ՝ տղամարդիկ, որովհետև նրանց համարձակությունն առավել է, իսկ կանայք վախենում են համարձակ քայլերից»,- մեկնաբանեց Ս. Խուդոյանը` ընդգծելով, որ ինքնասպանությունը կանանց շրջանում ցուցադրական բնույթ ունի:
