2011թ. չորրորդ եռամսյակում Սպառողների վստահության ինդեքսը (ՍՎԻ) նախորդ տարվա նույն եռամսյակի նկատմամբ նվազել է 5.3%-ով` նախորդ եռամսյակում գրանցված 6.3% աճի փոխարեն: Ընթացիկ պայմանների ինդեքսը երեք եռամսյակ անընդմեջ աճում է: Այս եռամսյակ այն աճել է 2.4%-ով` նախորդ եռամսյակի 11.8%-ի դիմաց:
Ընթացիկ պայմանները գնահատող ինդեքսներից զգալի աճել է խոշոր գնումներ իրականացնելու փաստի ինդեքսը (10.3%-ով)` մոտենալով նախորդ եռամսյակի աճի մակարդակին (11.6%-ով): Եկամուտների փաստացի փոփոխության ինդեքսն աճել է 1.9%-ով (7.7%-ով պակաս նախորդ եռամսյակի նույն ցուցանիշից): ԿԲ հասարակայնության հետ կապերի ծառայությունից «Առաջին լրատվական»-ին հայտնեցին, որ ընթացիկ պայմանները գնահատող ինդեքսներից այս եռամսյակ նվազել է միայն ընդհանուր տնտեսության վիճակի վերաբերյալ տնային տնտեսությունների գնահատականների ինդեքսը` 9.7%-ով` նախորդ եռամսյակում ունեցած 15.4% աճից հետո:
Ապագա պայմանների ինդեքսը, որը նախորդ եռամսյակ աճել էր 2.5%-ով, այս եռամսյակ նվազել է 10.7%-ով: Ապագա պայմանները գնահատող ինդեքսները բոլորն էլ նվազել են: Մասնավորապես, վատատեսական են գալիք եռամսյակում եկամուտների փոփոխության սպասումները. գրանցվել է ինդեքսի 17.2%-ով նվազում, այն դեպքում, երբ նախորդ եռամսյակ այն աճել էր 1.4%-ով: Նվազել են նաև գալիք եռամսյակում խոշոր գնումներ կատարելու և զբաղվածության աճի վերաբերյալ տնային տնտեսությունների սպասումները. գրանցվել են ինդեքսների համապատասխանաբար՝ 7.2 և 8.1%-ով նվազումներ:
