Ռուսաստանի մարդու իրավունքների նախագահական խորհուրդը դեկտեմբերի 21-ին Հետաքննչական կոմիտեին առաջարկել է վերանայել Միխայիլ Խոդորկովսկու և Պլատոն Լեբեդևի դեմ երկրորդ քրեական գործը:
Ինչպես հաղորդում է РИА Новости-ն, խորհրդի անդամներն առաջարկել են բողոքարկել դատավճիռը ՌԴ Գերագույն դատարանում: Նրանց կարծիքով՝ հետաքննության ժամանակ կատարվել են «հիմնավոր խախտումներ», որի հետևանքով թույլատրվել է դատական սխալ:
Նման սխալներից խուսափելու համար խորհուրդն առաջարկում է տնտեսական բնույթի գործի քննության ժամանակ ապահովել ատենակալների հնարավոր մասնակցությունը: Խորհրդի անդամները նաև առաջարկում են հիմնավորել այն պատճառաբանությունները, ըստ որոնց՝ գործի քննության ժամանակ այլ պաշտոնական անձանց, դատախազության կամ իրավապահ մարմինների կողմից դատավորի վրա ճնշման դեպքերի առկայութան պարայագում պետք է բացառվի դատավորի մասնակցությունը:
Բացի այդ, փաստաթղթում ասվում է, որ անհրաժեշտ է թույլատրել մեղադրյալին և նրա պաշտպանյալին դատական նիստի ժամանակ հարցաքննել մեղադրող կողմի վկաներին:
ՅՈՒԿՕՍ-ի երկրորդ գործով դատավճիռը կայացվել է 2010 թ. դեկտեմբերի 30-ին Մոսկվայի Խամովնիչեսկի դատարանի կողմից: Դատավոր Վիկտոր Դանիլկինի վճռով Խոդորկովսկին և Լեբեդևը մեղավոր են ճանաչվել 892 մլրդ ռուբլու նավթ գողանալու և 480 մլրդ ռուբլու անօրինական եկամուտներ օրինականացնելու մեջ: Առաջին գործի (խարդախություն և հարկերից խուսափում) հետ միասին Խոդորկովսկին և Լեբեդևը դատապարտվել են 14 տարվա ազատազրկման:
